«Ўзатом» агентлиги делегацияси 11-13 ноябрь кунлари Будапешт шаҳрида (Венгрия) ва 14-15 ноябрь кунлари Москвада бўлди. Ташрифдан мақсад - Венгриянинг атом энергетикаси соҳасидаги тажрибасини ўрганиш, дея хабар беради «Ўзатом» агентлиги матбуот хизмати.
Венгрияда мамлакат аҳолисининг электр энергиясига бўлган эҳтиёжнинг 50 фоиздан ортиғини 1980-йилларда қурилган ВВЭР-440/213 сув ядровий реакторлари асосидаги 4 энергоблокдан иборат «Пакш-1» электр станцияси таъминлайди. Бугунга келиб ҳар бир энергоблок қуввати 500 МВт’гача оширилган, уларнинг эксплуатация муддати узайтирилган. Бундай қувватга АЭС модернизацияси, турбиналарнинг яхшиланиши ва янада бойитилган ёқилғидан фойдаланиши натижасида эришилган.
Россия дизайни асосидаги «3+» авлоднинг икки энергоблокли «Пакш-2» АЭС қурилиши лойиҳасига старт берилиши муносабати билан 2032 йилдан энергоблоклар кетма-кет эксплуатациядан чиқарила бошлайди. Узлуксиз электр энергияси генерациясини таъминлаш учун биринчи блокни ишга тушириш 2030 йилга мўлжалланган.
«Ўзатом» агентлиги делегацияси «Пакш-2» АЭС лойиҳаси учун масъуллар – “портфелсиз” вазир Ян Шули, Венгрия инновациялар ва технологиялар вазирлиги давлат котиби Андреа Беатрикс Кадар, Венгрия атом энергетикаси регулятори бош директори Дюлей Фихтингер, «Пакш-2» атом электр станцияси бош директори Иштван Ленкейем ва бошқалар билан учрашди.
Учрашувлар давомида таъкидланишича, мазкур лойиҳа мамлакатдаги электр энергиясига бўлган эҳтиёжнинг ошиши билан боғлиқ. 2017 йилнинг 30 мартида янги АЭС қурилиши учун майдон танловига лицензия олинди. Айни дамда лойиҳа янги АЭС қурилиши учун лицензия олиш босқичида. Венгрия томон Россия дизайни асосидаги «3+» авлоднинг ВВЭР-1200 энергоблоки сифат ва хавфсизлик нуқтаи назаридан танлангани таъкидланди.
Лойиҳани амалга ошириш олдидан АЭС қурилиши ва ишга туширилишининг атроф-муҳитга таъсирини баҳолашга доир фикрлар ўрганилди.
«Пакш-2» АЭС лойиҳасини амалга ошириш мақсадида Венгрия томон «Росатом» давлат корпорацияси билан шартнома имзолаган, шунингдек ҳужжат экслуатация даврида лойиҳани қўллаб-қувватлаш ва ёқилғи етказиб беришни ҳам кўзда тутади.
Учрашув давомида венгрияликлар атом энергетикаси ушбу соҳани ривожлантиришда асосий омил бўлиб хизмат қилаётгани ва Венгрия яқин келажакда кўмирдан бутунлай воз кечиб, фақат атом энергетикаси ва қайта тикланувчи энергия манбаларига эътибор қаратишни режалаштираётганини таъкидлашди.
