20 декабрь куни Ўзбекистон ёшлар иттифоқи Марказий Кенгашининг «Ёшлар пресс клуби»да болаларни зарарли ахборотлардан ҳимоя қилиш масаласида мутахассисларнинг фикр-мулоҳазаларини эшитиш ва амалиётга жорий этиш мақсадида Ўзбекистон ёшлар иттифоқи ҳамда Адлия вазирлиги ҳузуридаги Ҳуқуқий сиёсат тадқиқот институти ҳамкорлигида «Вояга етмаганларни зарарли ахборотлардан ҳимоя қилишда ҳуқуқий иммунитет аҳамияти» мавзусидаги анжуман ташкил этилди.
Унга мавзудан келиб чиқиб, Адлия вазирлиги ҳузуридаги Ҳуқуқий сиёсат тадқиқот институти профессорлари, Республика маънавият ва маърифат маркази раҳбарининг биринчи ўринбосари Муҳаммад Қуронов, Ўзбекистон ёшлар иттифоқи Марказий Кенгаши раиси ўринбосари Бегмат Очилов ўз маърузалари билан қатнашди. Тошкент ахборот технологиялари университети, Тошкент кимё-технология институти, касб-ҳунар коллежлари ва мактаб ўқувчилари керакли мавзуда атрофлича маълумотга эга бўлиб, унга оид ўз фикр-мулоҳазаларини билдиришди.
Анжуманда Ўзбекистон Республикасининг «Болаларни уларнинг соғлиғига зарур етказувчи ахборотдан ҳимоя қилиш тўғрисида» қонуни, президентнинг 2017 йил 11 августдаги «Матбуот ва ахборот соҳасида бошқарувни янада такомиллаштириш тўғрисида» фармони, шунингдек, 2017 йил 13 сентябрдаги «Китоб маҳсулотларини нашр этиш ва тарқатиш тизимини ривожлантириш, китоб мутолааси ва китобхонлик маданиятини ошириш ҳамда тарғиб қилиш бўйича комплекс чора-тадбирлар дастури тўғрисида» қарори мазмун-моҳияти ва аҳамияти ҳақида сўз юритилди.
Мулоқот давомида болаларни уларнинг соғлиғига зарар етказувчи ахборотдан ҳимоя қилишни таъминловчи ҳуқуқий, ижтимоий-иқтисодий, ташкилий ва техникавий шарт-шароитлар яратиш, шунингдек ушбу соҳадаги илмий ва амалий тадқиқотларни ривожлантириш зарурлиги таъкидланди.
«Вояга етмаганларни зарарли ахборотлардан ҳимоя қилишда энг биринчи «Ҳуқуқий иммунитет»ни пайдо қилиш, болаларда китоб мутолаасига қизиқиш уйғотиш, китобхонликни тарғиб этиш, маънавий-маърифий тадбирларнинг сифатини ошириш, мактабларда «Ҳуқуқ асослари» фани салмоғи ва сифатини ошириш, оила, мактаб ва жамоатчилик ҳамкорлигини мустаҳкамлаш лозим», - дейди Ўзбекистон ёшлар иттифоқи Марказий Кенгаши раиси ўринбосари Бегмат Очилов.
Анжуман иштирокчилари Ҳуқуқий сиёсат тадқиқот институти томонидан «Болаларни уларнинг соғлиғига зарар етказувчи ахборотдан ҳимоя қилиш тўғрисида» Қонун ижроси юзасидан умумтаълим мактаблари ўқитувчилари ўртасида ўтказилган социологик тадқиқот натижалари билан таништирилди.
«Умумтаълим муассасаларида ўқувчиларнинг телефонлардан фойдаланиш қоидаларини такомиллаштириш, смартфонли телефонлардан фойдаланишни чеклаш, бу ҳақда махсус қонунларда нормалар белгилаш фарзандларимизни зарарли ахборотлардан сақлашда самара беради», - дейди Адлия вазирлиги ҳузуридаги Ҳуқуқий-сиёсий тадқиқот институти бўлим бошлиғи Комил Синдоров.
«Бир пайтлар маҳаллада битта хулқи ёмон бола бўлса, ота-оналар «Қозонга яқин юрсанг, қораси юқар» деб, фарзандлари ёмонларга қўшилиб кетишидан жони ҳалак бўларди. Бугун эса бола уйдан чиқмасдан ҳам ёмонларга қўшилиши, интернет орқали чекланмаган зарарли ахборотларни олиш имкониятига эга. Хонасидан, ҳатто овқатланишга ҳам чиқишни хушламаётган боласи ҳақида ота-она «дарс қилиб ўтирибдида» деган янглиш хаёлга бориши оддий ҳолга айланиб қолган. Мақсадимиз ёшларни интернетдан бутунлай ажратиб қўйиш эмас, балки улар учун холис ахборот муҳитини яратишдир. Чунки, бола тарбияга оид хулқ-атвор кўникмаси, ҳаёт тамойиллари, фикрлаш ва олам манзарасини кўпроқ айнан интернет ёрдамида ўрганиш имкониятига эга. Бироқ виртуал оламда ҳам уларни муайян хавф-хатарлар ва таҳдидлар кутиб турган бўлиши мумкин. Вояга етмаганларни таҳликали шароитларда қай тарзда ўзини муҳофаза қилиши ва зарарли ахборотлардан ҳимояланишини ўргатиш учун ҳам мазкур анжуманни ўтказяпмиз», - деган Ўзбекистон ёшлар иттифоқи Марказий Кенгаши бўлим мудири Акмал Алимов.
Шаҳноза Нуруллаева
