Ислоҳотлар кўп меҳнат ва машаққатни талаб этади. Ижтимоий масалалар эса бу ишнинг энг оғриқли нуқтаси ҳисобланади, деганди мамлакатимизга келган Жаҳон банки вакили. Бундай оғриқли ижтимоий масалалардан бири ичимлик сувидир.
Навбатдаги мурожаат сабаб ижодий гуруҳимиз билан Тошкент вилоят Пискент туманига отландик. Мурожаатчилар бу сафар «Анор» боғдорчилик узумчилик ширкати аъзолари ва раҳбарлари эди. Ширкат ҳудудида бир гуруҳ шикоятчилар ва уларнинг адвокати билан учрашдик.
Видео: Mover (tas-ix)
Видео: Youtube
«Ҳозирги кунда кўплаб қишлоқлар президентнинг «Обод қишлоқ» дастурига биноан обод қилиниб келинмоқда. Биз эса ўз ҳудудларимизни ўзимизнинг кучимиз билан кўркамлаштириш ниятида ичимлик сувини ҳал қилмоқчи эдик. Шу масалада ичимлик суви чиқариш масаласи бўйича йиғилиш ўтказдик. Ушбу йиғилишда Жамиятнинг 80дан ортиқ аъзолари иштирок этишди. Бир овоздан қарор қабул қилинди. Жамиятимиз ҳудудида собиқ иттифоқ даврида қурилган металл қувурларни кесиб олиб, уларни сотиб, эвазига 128 миллион сўм электр энергияси қарздорлигини қопламоқчи бўлдик. Қолган маблағлар ҳисобига ичимлик суви тўплаш минораси ўрнатиб, пластмасса қувурлар орқали ҳар бир кўчага сув олиб киришга қарор қилдик. Шу йилнинг 18 октябрь куни ишлар бошлаб юборилди, сув тўплаш минораси олиб келиб ўрнатилди, қувурлар кўмиш учун чуқурлар кавланди. Аммо, 20 октябрь куни Олмалиқ шаҳар ИИБдан тезкор вакил келиб, бирор қарорсиз ва баённома расмийлаштирмасдан, жамиятимиз мулки ортилган автомашинани шаҳар ИИБга олиб кетди. Бу ҳолатга эътироз билдирсакда, эътирозларимиз эшитилмади, инобатга олинмади. Бизга ўхшаш бошқа ширкатлар шундай қурилишларни қилишмоқда. Нега биз буни ўзимизнинг ҳисобимиздан қиламиз», дейди ширкат раҳбари Тоҳир Ирисбаев.
Аҳолининг бошқа вакиллари билан суҳбат қурганимизда улар кўплаб эътирозлар билдиришди.
«ИИБ ходими ҳеч қандай ҳужжатсиз келиб ширкатнинг мулкини олиб кетаверадими? Ниятимиз шу ерларни обод қилиш бўлса, бунинг давлатга қандай зарари тегяпти?», дейди улар.
