Ўзбекистонда фойдаланиладиган сув ресурслари 90 фоизи қишлоқ хўжалигига тўғри келяпти

Қирғизистоннинг етакчи Alliance-press.kg ахборот-таҳлил агентлиги порталида "Ўзбекистон: сувни тежаш – келажакка ғамхўрлик" сарлавҳали мақола эълон қилинди.

"Сув танқислиги Марказий Осиёдаги ижтимоий-иқтисодий барқарорликка жиддий таъсир кўрсатиши сабабли ўз вақтида самарали чора-тадбирлар кўриш зарурлигини инобатга олиб, Ўзбекистонда президент ташаббуси билан сув хўжалигини комплекс ривожлантириш ва сув ресурсларидан оқилона фойдаланишга алоҳида эътибор қаратилмоқда, – дейилган нашрда.

Қайд этилишича, мамлакатда 2020–2030 йилларда республика сув хўжалигини ривожлантириш концепцияси тасдиқланган бўлиб, унинг доирасида муайян даврга мўлжалланган стратегиялар қабул қилинган ва улар ҳаётга татбиқ этилмоқда.

Қирғизистон ОАВ, шунингдек, Ўзбекистонда фойдаланиладиган сув ресурсларининг 90 фоизи қишлоқ хўжалигига тўғри келишини маълум қилган. Шу билан бирга, мамлакат минтақадаги энг ривожланган ирригация тизимлари ва йирик сув инфратузилмасига эга давлат эканлигини маълум қилган.

"Ўзбекистон президенти ташаббуси билан 2024 йил "Суғориш тармоқларида сув йўқотилишини камайтириш йили" деб эълон қилинди. Бунинг учун 1500 километр магистрал каналларни реконструкция қилишга давлат бюджетидан салмоқли маблағ ажратилди. Шунингдек, Хитойнинг нуфузли компаниялари жалб этилди. Бундан ташқари, кластер ва фермер хўжаликлари ташаббуси билан 13,5 минг километр ички суғориш каналлари бетонлаштирилди", – дейилган материалда.

Мақолада Марказий Осиё давлатлари раҳбарлари ўртасидаги дўстона ва ишончли муносабатлар минтақада трансчегаравий сув ресурсларидан биргаликда фойдаланиш учун мустаҳкам замин яратгани урғуланган.

Бундан ташқари, Alliance-press.kg "Кўп йиллардан буён ўз ечимини топмай келаётган кўплаб масалалар ўз ечимини топди, Сирдарё ва Амударё ҳавзаларида сув таъминотини яхшилашда ижобий натижаларга эришилди", – деб ёзган.