Ўзмиллийбанк Раффайзенбанк Германия билан 300 миллион евролик келишув имзолади

Ўзбекистон Республикаси Президентининг ташаббуси билан 2019 йил «Фаол инвестициялар ва ижтимоий ривожланиш йили» деб эълон қилинди. Давлат раҳбари таъкидлаганидек: «Инвестиция – бу иқтисодиёт драйвери, ўзбекча айтганда, иқтисодиётнинг юраги».  

Мамлакатнинг 2019 йил учун белгиланган ривожланишнинг энг муҳим устувор йўналишларига асосан, Ўзбекистон Республикаси Ташқи иқтисодий фаолият миллий банки томонидан Европанинг етакчи банклар билан яқин ҳамкорликни ўрнатиш бўйича комплекс чора-тадбирлар амалга оширилмоқда. 

2019 йил 14 январь куни Берлинда Ўзбекистон Республикаси Президенти Ш.М. Мирзиёевнинг Германия Федератив Республикасига давлат ташрифи арафасида бўлиб ўтган Ўзбекистон-Германия бизнес форуми доирасида Ўзмиллийбанк ва Райффайзенбанк Германия ўртасида 300 млн. евро миқдоридаги кредит шартномаси имзоланди. 

Имзоланган келишув Европа иттифоқидан экспорт кредит агентликлари (ЭКА) суғурта қопламаси остида юқори технологияли ускуналар ва технологиялар экспортини молиялаштиришни назарда тутади. Шунингдек, Ўзбекистонда йирик инвестицион лойиҳаларни биргаликда молиялаштириш 7 йил муддатга узоқ муддтли кредит линия бериш орқали амалга оширилади. 

Раффайзенбанк Германия билан тузилган келишув “2017-2021 йилларда Ўзбекистон Республикасини ривожлантиришнинг бешта устувор йўналиши бўйича ҳаракатлар стратегияси”да белгиланган мақсадларни амалга оширишга ёрдам беради, республикамизнинг экспорт салоҳиятини оширишни рағбатлантириш, хорижий инвестицияларни фаол жалб қилиш, маҳаллий ишлаб чиқарувчиларнинг ички ва ташқи бозорда рақобатбардошлигини ошириш, шунингдек, бизнеснинг кенг ривожлантириш учун инвестиция ва ишбилармонлик муҳитини яратиш ва таколмиллаштиришга қаратилган. 

Таъкидлаш жоизки, Раффайзенбанк Германия Ўзмиллийбанкнинг узоқ муддатли ҳамкори, хусусан, ғазначилик ва ҳужжатли операциялар соҳасида. Икки банкнинг ҳамкорлиги 2001 йилда бошланган. 

Raiffeisen банк-молия гуруҳининг тарихи 19 асрнинг ўрталарига тўғри келади: биринчи Raiffeisen институти 1886 йилда очилган. Raiffeisen Bank International AG (RBI) гуруҳи банкнинг асосий банк бўлинмаси бўлиб, Марказий ва Шарқий Европа минтақасида 170 млрд. АҚШ долларидан ортиқ активлари билан етакчилик қилади. Умуман олганда, RBI 2200дан ортиқ бўлинмаларга эга бўлиб, минтақанинг 14 мамлакатида филиаллари мавжуд. 47 мингга яқин банк ҳодимлари 16 миллионга яқин мижозларга хизмат кўрсатади. 

Сайт: www.nbu.uz

Реклама ҳуқуқи асосида