Кореянинг Конкук университети ва Тошкент давлат аграр университети ўртасида ҳамкорлик алоқалари кенгайтирилади 

4 февраль куни Тошкент давлат аграр университетига Кореянинг Конкук университети раҳбар ходимлари ташриф буюрди. 

Ташриф давомида делегация ТошДАУ раҳбарияти билан учрашди ва ўсимликларни биологик ҳимоя қилиш, пахтачилик ва ғаллачилик лабораторияси, ТошДАУнинг “Қишлоқ хўжалигида инновацион ишланмалар ва маслаҳат маркази” ҳамда “Гидропоника” иссиқхонасида бўлди ҳамда университетнинг “Қўшма таълим” дастури асосида таълим олаётган талаба ва магистрлар билан учрашди.

Меҳмонлар шунингдек, Олий ва ўрта махсус таълим вазирлиги, Қишлоқ хўжалиги вазирлиги мутасадди ходимлари билан учрашиши режалаштирилган. Бундан ташқари, Корея Республикаси делегацияси Самарқанд шаҳридаги диққатга сазовор жойлар билан яқиндан танишади.

Ташриф давомида ТошДАУ ва Конкук университети ўртасида талабалар ва профессор-ўқитувчилар алмашувини амалга ошириш, икки томонлама тан олинадиган диплом бериш бўйича қўшма таълим дастурларни жорий этиш, Конкук университетининг қишлоқ хўжалиги соҳасидаги малакали профессор-ўқитувчилари ва мутахассисларини ўқув жараёнига жалб этиш, ТошДАУ профессор-ўқитувчиларини малака ошириш ва стажировкага юбориш, иқтидорли ёшларни магистратура ва докторантурага ўқишга юбориш, ҳамкорликда ўқув адабиётларини яратиш ҳамда илмий-тадқиқот ишларини олиб бориш бўйича келишиб олинди

Шунингдек, икки университет ўртасида ҳамкорликни кенгайтириш ва келишувларни амалга ошириш бўйича “Йўл харитаси” имзоланди. 

Икки университет ўртасида ҳамкорликни янада кенгайтиришга ҳамда Ўзбекистон Республикаси қишлоқ хўжалигини ривожлантиришига қўшган ҳиссаси учун Конкук университети президенти Санги Минга ҳамда ҳозирда университетда фаолият олиб бораётган Жанубий Кореянинг Ўзбекистон-KOPIA маркази директори доктор Ан Хи Сунгларга Тошкент давлат аграр университетининг фахрий профессори унвонлари берилди.

Кейинги учрашув жорий йилнинг апрель ойида Конкук университетига режалаштирилди.

Конкук университети билан ТошДАУ 2015 йилдан буён ҳамкорлик қилиб келмоқда. Шу давр мобайнида университетнинг 10 дан зиёд талабалари Конкук университети магистратурасини тамомлаб келди.

Конкук университети Корея Республикаси олий таълим муассасалари рейтингида биринчи ўнталикка, жаҳон рейтингида эса юқори 500 таликка киради.