Назарбоев Қозоғистоннинг янги ҳукуматига қандай топшириқлар берди?

Қозоғистон президенти Нурсултон Назарбоев ҳукмрон «Нур Отан» партиясининг XVIII қурултойида сўзлаган нутқининг тўлиқ матни эълон қилинди. Бу ҳақда Tengrinews хабар қилмоқда.

Қурултойда Назарбоев янги замон янгича чақириқларга чорлаётгани, атрофдаги дунё эса тобора перманент турбулентликка шўнғиб бораётганини қайд этган.

«Бу келажак олдида умидсизлик ва қўрқувга тушиш учун сабаб бўла олмайди асло. Ҳар қандай кризислар кескин ўзгаришларга сабаб бўлади, лекин шу вақтнинг ўзида ўсиш учун муҳит яратади ва янги имкониятлар эшигини очади. Муҳими — ривожланишнинг тўғри йўналишини белгилаб олиб, олдинга қўйилган мақсадлар йўлида бутун жамоатчиликни бирлаштира олиш», — деди Нурсултон Назарбоев.

«Биз ривожланиш учун маблағларни тежамасдан, ёрдамга муҳтож қатламга кўмак беришимиз керак. Ҳукумат бу мақсадларга ажратилаётган маблағларни тўғри тасарруф этиши керак. Ижтимоий сиёсат мувозанатлаштирилган бўлиши ва боқимандалик кайфияти ҳосил бўлишига йўл қўймаслиги керак», — деди Назарбоев

Қозоғистон президенти давлатнинг бош мақсади одамларга иш бериши эканлигини таъкидлаб ўтди. Давлат ёрдами эса алоҳида кўмакка муҳтож шахсларга берилиши ва манзилли бўлиши керак.

«Мен ўзим шахсан ажратилаётган барча маблағлар ҳар бир оилага, муайян инсонга етиб боришини назорат қиламан! Менинг топшириғимга кўра партия бугун халқимизни айниқса ташвишга солаётган муаммоларнинг таҳлилини ўтказди. Уларнинг орасида болалар учун нафақа пули миқдорини ошириш, кўп фарзандли оилаларнинг шароитини яхшилаш, уй-жой билан таъминлаш, ижтимоий инфратузилмани модернизация қилиш», — деди Назарбоев.

Кўп фарзандли оилаларга маошни ошириш ва уларни қўллаб-қувватлаш

Назарбоевнинг фикрича, партия уч йўналиш бўйича ижтимоий сиёсат олиб боради. Бу аҳолининг кам таъминланган қатламлари даромадларини ошириш ва уларни қўллаб-қувватлаш, даромади паст бўлган фуқароларнинг уй-жой масалаларини ҳал қилиш ҳамда таълим ва соғлиқни сақлаш соҳаларини яхшилаш, ҳудудларни комплекс ривожлантириш.

«Бугун Қозоғистон оилаларининг турмуш шароитини яхшилашимиз керак. Бу соғлиқни сақлаш, таълим, ижтимоий ҳимоя, маданият, спорт, қишлоқ хўжалиги ва бошқа соҳаларда меҳнат қилаётган 1 миллиондан ортиқ фуқаролар дегани. 2019 йилнинг 1 июлидан бюджет соҳасининг кам маош тўланувчи ходимларининг ойлик иш ҳақини 30 фоизга, район ва область даражасида бевосита фуқаролар билан ишлаётган қуйи табақадаги ходимларнинг маошини эса ўртача 25 фоизга оширишни буюраман.

Кўпфарзандли оилаларни қўллаб-қувватлаш учун чораларни кўпайтириш керак. Бугун мамлакатда 340 мингдан зиёд оила 4 ва ундан зиёд фарзандга эга. Манзилли ижтимоий ёрдам олиш ҳуқуқига эга бўлган оилаларни манзилли қўллаб-қувватлаш учун, кўп фарзандли оилаларда ҳар бир бола учун 20789 танга (55 АҚШ доллари) миқдорида минимал тўлов белгиланади. Манзилли ижтимоий ёрдам кўрсатиш натижасида 2019 йилда 830 минг киши, жумладан 550 минг бола қамраб олинади», — деди Назарбоев

У шунингдек ногирон фарзанд тарбиялаётган ота-оналар, васийлар ва оилаларга нафақани 30 фоизга ошириш топшириғини берди. Бу 100 минг кишини қамраб олади. Бу чоралар учун 300 млрд танга ажратилади.

Таълим ва тиббиёт

«Ҳар бир ҳудудда камида битта нуфузли олийгоҳ ва ўнта замонавий коллеж фаолият кўрсатиши керак. Ўқув муассасалари самарадорлигининг бош мезони битирувчиларнинг ишга жойлашиши бўлмоғи лозим. Мамлакатимизнинг ҳар бир фуқароси билимли ва шу билан бирга соғлом бўлиши керак. Яшаш жойидан қатъи назар, сифатли тиббий хизматга йўл очишимиз шарт», — деди Назарбоев.

Қозоғистон президенти соғлиқни сақлаш соҳасига қўшимча 120 миллиард танга ажратилишини буюрди.

«Нега бизда ҳанузгача ҳудудлар ривожланганлиги масаласида «узилишлар» кўзга ташланмоқда. Нега айрим областларда йўллар яхши, бошқаларида ёмон? Нега айрим жойларда уй-жой коммунал хўжалиги барқарор ишлайди, бошқа бир жойда узилишлар бор? Демак, чиндан ҳам ишлаётган, инсонларнинг муаммосини биладиган ва ечадиган ҳокимлар бор. Ҳокимлар халққа яқин бўлиши, унинг фаровонлиги учун қўлидан келган барча ишни қилиши керак. Бизда турли дастурлар бор, етарли маблағлар ажратилмоқда, лекин инсонлар аниқ бир натижага эга бўлмаяпти. Иш бу тарзда кетишига йўл қўйиб бўлмайди», — деди Назарбоев.

Мамлакатнинг янги харитаси

Қозоғистон президент мамлакат йўлларини яхшилаш учун қўшимча яна 350 миллиард танга ажратилишини айтиб ўтди. Мазкур чора 2025 йилга бориб область ва район аҳамиятидаги 95 фоиз автойўлларнинг яхшиланишига олиб келади.

«Йирик шаҳарлар — Остона, Олмаота ва Чимкент атрофи муаммосини ҳал қилиш учун 2019-2021 йилларда яна 90 миллиард танга ажратилади. Сув таъминоти ва сувни оқизиб кетиш учун 140 миллиард танга ажратилади ва бу соҳада 2,2 миллион кишининг муаммоси ҳал бўлади.

«Газлаштириш ва электр таъминоти учун яна 190 миллиард танга ажратилишига топшириқ бераман. Бу чора 1,1 миллион кишининг газ таъминотини яхшилайди, ҳудудларда электр таъминоти ишончлилигини оширади», — деди Назарбоев.

Қурултойдан бошқа иқтибослар:

• «Бизда шунингдек қишлоқларда яшовчи 7,5 миллион кишининг турмуш шароитини яхшилаш учун имкониятлар бор»
• «Биз қишлоқларни ўсиш ва барқарор ривожланиш нуқтасига айлантиришимиз керак. Қишлоқларда халқ истеъмоли моллари, қишлоқ хўжалиги маҳсулотларини қайта ишлаш ва бошқа бизнеслар бўйича ХХР тажрибасини ўзлаштириш керак».
• «Янги вазирлар маҳкамаси ва ҳокимлар мен томонимдан янграган топшириқларни зудлик билан амалга оширишга киришиши керак. Ҳукуматнинг ҳар бир аъзоси ва ҳокимлар шахсан масъул бўлиб, ишнинг натижасига шахсан жавоб беради».
• «Партия аҳолининг барча қатламлари манфаатларини акс эттириши ҳамда фуқаролар ва давлат ўртасидаги асосий боғловчи бўғин сифатида фаолият кўрсатиши керак».
• «Иқтисодий ривожланиш аҳолининг турмуш шароитини оширишга йўналган бўлиши керак».
• «Коррупцияни бартараф этиш бўйича мақсад сари йўналган ишларни давом эттириш керак. Бу ҳолат диққат марказида ёшлар бўлиши керак».
• «Биз аҳоли билан рўй-рост ва очиқ мулоқот қилишимиз, уларнинг турмуш шароити ва ҳаёти сифатини ошириш учун барча ишларни амалга оширишимиз лозим».