Асакадаги «Юксалиш» маҳалласида муаммолар «юксаляпти»

Мурожаатни ўрганиш жараёнида аввал муаммоли ҳолатни кўриб, сўнг айнан шу ҳудудга масъул бўлган мутасаддилар фикри билан танишиш лозим. Ана шунда масала бор бўй-басти билан намоён бўлади.

Бироқ Андижон вилояти Асака шаҳри, “Юксалиш” маҳалласидаги учта бир хил Юксалиш номли кўчалардаги муаммоларни ўргангач, йигирма йиллик камчиликлар ҳақида мутасаддиларга аҳоли дардини айтиб овора қилгимиз келмади. Улардан фақат битта фикрни эшитиш мумкинлигини ҳам билардик: “Сизлар мана шу масалани сайтга олиб чиқманглар. Биз бир ҳафтада, албатта, охирига етамиз”. Йигирма йиллик муаммолар бир ҳафтада бироз олдинга силжиши учун эса уларга тузукроқ туртки керак.

Мурожаатни ўргангани бориб, бу ердаги камчиликлар кўплаб маҳаллаларда бор эканини гаплашдик. Қарангки, йўлнинг одам юриб бўлмас даражага келиши, электрдаги сурункали узилишлар, газ баллони билан таъминланмаслик, ичимлик сувини узоқдан ташиб келиш одатий ҳолатга айланиб, бизни деярли ташвишлантирмай қўйибди.

Маҳалла аҳли чорак аср аввал шу ҳудудга кўчиб келганидан бери муаммолар ичида яшайди.

“Тасаввур қилинг. Мана бу йиқилиб тушай деб турган “столба”ларни, ундаги симларни ҳам ўзимиз пул тўплаб ўрнатганмиз. Трансформаторимиз эскириб, маҳаллага кучи етмай, тинмай ишдан чиқяпти. Уни ҳам ўзимиз пул йиғиб олгандик. Кўчамизнинг ҳолатини мана ўзингиз кўриб турибсиз. Кўчиб келингандан бери бирор марта ҳокимлик эътибор бермаган. Ўзимиз шағал тўктириб, эпақага келтирамиз. Ичимлик сувини ташиб ўрганиб кетдик. Менимча, бизнинг кўчани борлигини ҳокимлик вакиллари билмаса ҳам керак”, - дейди биз билан суҳбатда Сижойиддин Умрзақов.

Инсон ҳаёт кечириши учун муҳим бўлган йўл, электр таъминоти, газ ва ичимлик сувидаги муаммолар Асаканинг чекка қишлоғида эмас, балки шаҳар биқинидаги маҳаллада тўлиб ётибди.

Бизнинг келганимиздан хабар топган маҳалла аёллари ҳам ёнимизга келиб ўз дардларини тўкиб солишди.   

“Йўлимиз жуда ёмонлиги ҳақида йиллар давомида мурожаат қилмаган жойимиз қолмади. Яқинда яна шаҳар ҳокими Хурсандбек Йўлдошевга учраганимизда, у киши “Йўл бўлимига айтдим. Албатта таъмирлашади”, деб ваъда берганди. Кутяпмиз. Маҳалламиз болалари мактабга кетаётиб, катта кўчага чиққунча оёғига қора целлофан пакет кийиб чиқишади. Табиий газга уланмаганмиз. Газ баллон сўраб боравериб, беришмаганидан сўнг охири уялиб бормай қўйдик.Ҳужжатларни олиб борамиз. Барибир баллон беришмайди. Электр ҳозирги кунда ҳам суткасига икки марта ўчяпти. Шароитимиз жуда чатоқ”, - дейди Феруза Зокирова.

Маҳалла фаоли Иброҳимжон Мамажонов билан кўчаларни айландик. Маҳалла ўз-ўзига шароит яратиш бўйича анча ишлар қилибди. Ҳокимликдан йўлни тузатишга 20 йил давомида ёрдам бўлавермагач, ўзлари икки-уч бор шағал тўкишган.  

Уларнинг шу кундаги ишлари янада қизиқ. Маҳалла ўзининг фондига эга. Унда доим пул тўпланиб боради. Ва ўша пулларга 200 литр дизель ёқилғи йиғган. Нега, деб сўрайман. “Ҳокимликдан йўлларимизни текислаш учун грейдер сўраймиз-ку, шунга керак бўлади”, дейди Иброҳимжон Мамажонов. Бироқ, йўл корхонасига боришса техника беришмаган.   

Ўзлари ўрнатган симёғочлар йиқилиб тушай деб, ағанаб ётибди. Туман электр тармоқлари 50та оиладан иборат учта кўчага бирон марта келмаган. Маҳалла билан туман “Тоза ҳудуд” ташкилоти шартнома тузишни хоҳламагани учун чиқинди тўпланиб кетган. Балки, тозаликка масъул ташкилот автомашиналари кўчаларга ботиб қолишидан қўрққандир?... Буниси бизга қоронғи.

Маҳалланинг яна бир вакиласи Гулнорахон Темирова ҳам “Маҳаллага ёрдам керак. Ёритишга ҳаракат қилиб беринг. Маҳалла фуқаролар йиғинининг аҳоли муаммолари ечиш йўлида ҳаракат қилишини кутиб кун ўтяпти”, дея ўз фикрини билдирди.

Қисқаси, Асакага бориб, 150тадан зиёд аҳоли яшайдиган ҳудудда, яроқсиз лой йўллар, қийшайиб кетган симёғочларни кўриб, газ баллон берилмаган, ичимлик сувидан қийналаётган аҳоли вакиллари дардини тингладик. Ўтган йили уч марта ишчи гуруҳ келиб, ўрганиб кетган. Самарасиз ўрганишдан нима фойда?

Лекин, етти иқлимга донғи кетган асакаликлар маҳаллага, кўчага ном танлашга жуда уста экан. “Юксалиш” маҳалласи, Юксалиш кўчаси.

Қанийди, бу ердаги ҳолат танланган номга яраша бўлса эди. Бунинг учун туман ҳокими ва мутасаддилар “Юксалиш” маҳалласида аҳоли фаровонлиги юксалишига ҳаракат қилишади, деган умиддамиз.

Ўз мухбиримиз