«Белимга қўли билан урдими, оёғи билан тепдими, билмай қолдим, бошим билан машина ичига кириб кетдим...»
2019 йил 1 июль куни Kun.uz сайтига шошилинч мурожаат келиб тушди. Унда Жиззах вилояти Арнасой тумани ИИБ раҳбар ходимлари ғалла ўримини назорат қилиш чоғида фермерлардан бирининг отасини ургани, жабрдийда туман Марказий шифохонаси шошилинч тиббий ёрдам бўлимида экани хабар қилинган эди.
Kun.uz мухбирлари 1 июль куни 18-00 атрофида Арнасой тумани Марказий шифохона шошилинч тиббий ёрдам бўлимига етиб келди ҳамда жабрланувчининг ўғли Аҳмедов Дилшод билан учрашди.
Сўнгра, шифохона Шошилинч бўлим бошлиғи Темур Назаров жабрланувчининг аҳволи билан таништирди.
«Маълум бўлишича, бемор юқори гипертоник қон босимида юради. Аввал микроинфарктни ҳам бошдан кечирган. Қолаверса, 2-даражали қандли диабет билан ҳам хасталанган. Бу ерга келтирилганда қон босими 220-120 нисбатда баланд бўлганлиги учун тезкорлик билан тиббий ёрдам кўрсатиш мақсадида жонлантириш хонасига киритдик. Керакли муолажалар кўрсатдик», - дейди Темур Назаров.
Унинг сўзларига кўра, бемор бел соҳасида кучли оғриқдан шикоят қилган. Рентген қурилмаси йўқлиги сабабли уни Жиззах шаҳрига ёки Дўстлик туман марказига олиб бориш талаб этилади. Аммо кучли қон босими ҳамда асаби бузилгани боис уни ортиқча ҳаракатлантириш мумкин бўлмаган.
Биз шошилинч ёрдам бўлими бошлиғининг рухсати билан Аҳмедов Маматқулдан бўлган воқеаларни сўзлаб беришни сўрадик. Унинг айтишича, Жиззах шаҳрида ишлайдиган ўғли Дилшод унга қўнғироқ қилиб, туман ҳокими уни пост ГАИда кутиб турганини билдирган. Туман ҳокими унга Арнасой ҳосилига бир иложини қилиб ҳисса қўшишни айтади.
Туман ИИБ бошлиғи “ГАИ” (ЙҲХБ) бошлиғига “Камаз” топиб келишни айтар экан, Маматқул аканинг ҳам далага бирга бориши кераклигини қистириб ўтади. Бироқ куннинг иссиқлиги, юқори қон босими, қолаверса, бир карра микроинфарктни бошдан кечирган ва 2-тип қандли диабетли хаста Маматқул ака тоби йўқлигини айтиб, далага бора олмаслигини билдиради. ИИБ бошлиғи ўринбосари Мисаев Акром ва сержант ёрдамчиси фермернинг отасини далага мажбурлаб олиб бориш учун уни ўзларининг машиналарига миндиришга уринишади.
