Абдулазиз Комилов америкалик конгрессмен Трент Келли ва олим Фредерик Старрга «Дўстлик» орденини топширди

2019 йилнинг 27 сентябрь куни Вашингтон шаҳридаги Рональд Рейган номидаги Халқаро савдо марказида Ўзбекистон Республикаси мустақиллигининг 28 йиллигига бағишланган тантанали маросим бўлиб ўтди.

Тадбирда Конгресс, Оқ уй, Хавфсизлик кенгаши, Давлат департаменти, мудофаа, савдо, қишлоқ хўжалиги вазирликлари, Ғазначилик, Савдо вакили офиси, Эксимбанк, Миссисипи штати миллий гвардияси, АҚШ ва Канаданинг йирик компаниялари, экспертлар, жамоатчилик ва таълим доиралари, Жаҳон банки, Халқаро валюта фонди, Вашингтондаги дипломатик корпус вакиллари иштирок этди.

Ўзбекистон томонидан АҚШда бўлган ташқи ишлар вазири Абдулазиз Комилов бошчилигидаги мамлакат делегацияси иштирок этди.

ТИВ раҳбари меҳмонларни қутлар экан, уларга Ўзбекистонда амалга оширилаётган ислоҳотларнинг эришилган мақсадлари, АҚШ билан ҳар томонлама ҳамкорликнинг ривожлантириш ҳолати ва икки мамлакат ўртасидаги стратегик шерикликни бундан кейин ҳам давом эттириш истиқболлари тўғрисида маълумот берди.

АҚШ ҳукумати номидан Ўзбекистон мустақиллигининг 28 йиллиги билан табриклар экан, АҚШ президенти ёрдамчисининг ўринбосари Лиза Кертис Тошкент ва Вашингтон ўзаро дўстлик ва стратегик алоқаларни мустаҳкамлашда муҳим натижаларга эришганини таъкидлади. «Сўнгги уч йил ичида Ўзбекистон президенти Шавкат Мирзиёев раҳбарлигида мамлакатда жуда катта ўзгаришлар кузатилмоқда, - деди Лиза Кертис. – Биз янада кўпроқ очилаётган иқтисодиёт, ўзбек халқининг фаровонлигини оширишга қаратилган, президентнинг ўзи таъкидлаганидек қайтариб бўлмайдиган сиёсий ислоҳотларни амалга ошириш ташаббусларига гувоҳ бўлмоқдамиз». У мамлакатда амалга оширилаётган ислоҳотларни қўллаб-қувватлашга АҚШ қатъиян содиқ эканлигини таъкидлади.

«Биз Ўзбекистоннинг технологик салоҳиятини мустаҳкамлаш, касбий маҳоратини ривожлантириш ва бошқа кўплаб масалаларга - Жаҳон савдо ташкилотига киришдан бошлаб инглиз тилини ўқитиш тизимини такомиллаштиришга қаратилган молиявий ва техник ёрдам дастурларини кенгайтирмоқдамиз», - қайд этди Лиза Кертис.

Савдо ҳажмини сезиларли даражада ошишига олиб келган Ўзбекистоннинг конструктив минтақавий сиёсатининг ютуқлари алоҳида таъкидланди. Оқ уй вакилининг баҳолашича, ўтган йил давомида кунига Ўзбекистон-Қирғизистон чегарасидаги ўтказиш пунктидан ўтаётган транспорт воситалари сонининг 200 тадан 4 мингтага кўтарилиши бунга яққол мисолдир.

Ўзбекистоннинг минтақада барқарорлик ва хавфсизликни таъминлашдаги саъй-ҳаракатлари учун миннатдорчилик билдирилди. «Афғонистондаги можарони тинч йўл билан ҳал қилиш – мамлакатимизнинг ўта муҳим мақсади, – деди администрация вакили ва Ўзбекистон ва АҚШ шерикчилиги «уруш тилка-пора қилган ушбу мамлакатда тинчлик ва барқарорликка эришишнинг муҳим таркибий қисми» эканлигини таъкидлади. У президент Дональд Трампнинг президент Шавкат Мирзиёевга «Афғонистондаги можарони тинч ҳал қилиш йўлларини топиш борасидаги АҚШ саъй-ҳаракатларини қўллаб-қувватлагани учун» шахсан миннатдорчилик билдирганини эътироф этди.

Хавфсизлик кенгаши вакили Миссисипи губернатори Фил Браянт бошчилигидаги делегациянинг республикага ташрифи икки мамлакат ўртасидаги алоқаларни янги даражага кўтариш имконини берганини қайд этди. Ўз навбатида, АҚШ савдо вазири Уилбор Росснинг Ўзбекистонга сафари савдо ва бизнес ҳамкорлик салоҳияти билан бевосита танишиш учун қулай имконият тақдим этди.

У ўз сўзи якунида иқтисодиёт, контртерроризм, минтақавий хавфсизлик соҳаларида ёки инсон ҳуқуқларини яхшилаш йўналишида ҳам АҚШ икки мамлакат ўртасидаги стратегик шерикчиликни кейинги кунлар ва йилларда давом эттириш ва чуқурлаштиришни сабрсизлик билан кутаётганлигини айтди.

Тадбир доирасида АҚШнинг икки таниқли ижтимоий-сиёсий ва илмий арбобларига «Дўстлик» орденларини тақдим этиш маросими бўлиб ўтди.

Ташқи ишлар вазири Абдулазиз Комилов Ўзбекистон президенти топшириғига биноан юксак давлат мукофотини икки томонлама муносабатларни мустаҳкамлаш ишида, Ўзбекистон бўйича Кокус – АҚШ Конгрессидаги дўстлик гуруҳини ташкил этиш ҳамда парламентлараро мулоқотни сезиларли даражада кенгайтиришдаги хизматлари ва садоқати учун конгрессмен Трент Келлига топширди.

«Дўстлик» ордени Марказий Осиё ва Кавказ институти директори Фредерик Старрга ҳам топширилди. У узоқ йиллардан бери мамлакатнинг кўп асрлик тарихига, ўзбек халқининг маданияти, анъана ва одатларига оид илмий тадқиқотлар олиб бориб, АҚШ ва дунёнинг бошқа бурчакларидаги кўплаб одамларни Ўзбекистоннинг замонавий қиёфаси, республикадаги ички ўзгаришларнинг моҳияти ва мазмуни, ташқи сиёсатининг устувор вазифалари ҳақида хабардор қилмоқда.

Конгрессмен Трент Келли юксак мукофот учун Ўзбекистон раҳбариятига самимий миннатдорчилик изҳор этди. У «мазкур мукофот катта масъулият юклашини ва АҚШ-Ўзбекистон муносабатларини ривожлантириш ишида янги ташаббуслар ва конструктив ҳаракатларга рағбатлантиради», деди. Америкалик конгрессмен икки томонлама муносабатларнинг юқори динамикасидан ўта мамнунлигини изҳор этди. Президент Шавкат Мирзиёевнинг 2018 йил май ойидаги АҚШга расмий ташрифидан буён «Ўзбекистон-АҚШ муносабатлари янада яхшиланмоқда, кўп қиррали ҳамкорликни илгари суришга ўзаро қизиқиш ортмоқда». Ўзбекистоннинг стратегик жойлашуви, инсон омили ва цивилизацион салоҳияти ҳамда минтақада нуфузи ошганини ҳисобга олган ҳолда мамлакат АҚШ учун ўта муҳим аҳамият касб этиши таъкидланди.

Конгрессмен таъкидладики, Ўзбекистон ва АҚШ минтақада изчил иқтисодий ўсишга эришиш ва барқарорликни таъминлашда умумий мақсадлар ва устувор йўналишларга эга. Унинг сўзларга кўра, бу икки мамлакат ўртасидаги ҳар тарафлама ҳамкорликни янада мустаҳкамлашнинг муҳим шарти ҳисобланади.

Трент Келли АҚШ Конгрессида «Ўзбекистон бўйича Кокус» ҳамраиси, Техас штатидан конгрессмен Висенте Гонсалес билан Ўзбекистон ва АҚШ ўртасидаги стратегик шерикчиликни янада ривожлантиришни қўллаб-қувватлашга йўналтирилган АҚШ Конгрессининг махсус Қарори қабул қилиниши бўйича ташаббус билдирилганини маълум қилди.

Ўз навбатида, Фредрик Старр «Дўстлик» ордени билан тақдирлангани муносабати билан президент Шавкат Мирзиёевга чуқур миннатдорлик билдирди. Мазкур тақдирланиш у учун катта мукофот ҳамда республика раҳбари ва ўзбек халқининг юксак ишончи белгиси ҳисобланишини маълум қилди.

Фредрик Старр қайд этганидек, «Ўзбекистон тасаввур қилиб бўлмайдиган ўзгаришларни бошдан кечирмоқда. Ушбу ўзгаришлар узоқни кўзлаган ва кўп қиррали сифатга эга бўлиб мамлакатнинг ижтимоий-сиёсий, иқтисодий ва ижтимоий ҳаётининг барча жабҳаларини қамраб олади». Унинг фикрича, бу каби кенг миқёсли ислоҳотлар ва мамлакат раҳбариятининг интилишлари дунёда кам учраган. «Биз бу жараёнларни нафақат кузатишимиз, балки янада фаолроқ қўллаб-қувватлашимиз керак», деди АҚШнинг етакчи таҳлилий маркази раҳбари.

Тадбирда Колумбия округининг давлат котиби Кимберли Бассетт сўзга чиқди ва Вашингтон шаҳри мэри Мюрел Боусернинг табригини ўқиб берди:

«Вашингтон шаҳри мэри сифатида Ўзбекистон Республикаси Мустақиллигининг 28 йиллиги муносабати билан қабул иштирокчилари ва Ўзбекистон халқини табриклашдан бағоят мамнунман.

Ўтган йили Вашингтон Ўзбекистон президенти Шавкат Мирзиёевни кутиб олди. У мамлакатларимиз ўртасидаги стратегик шерикчилик муносабатларини мустаҳкамлашда муҳим роль ўйнади, қарийб 5 миллиард АҚШ долларига тенг шартномалар имзоланишига, икки томонлама ташқи савдо айланмасини 2 баробар ошишига ҳамда Ўзбекистонга ташриф буюрган америкалик сайёҳлар оқимининг 60 %га ошишига олиб келди».

Тадбир доирасида «Boeing» компаниясининг халқаро операциялар бўйича директори ва Америка-Ўзбекистон савдо палатасининг молиявий директори Брайн Лопп, «Honeywell» компаниясининг Туркия ва Марказий Осиё мамлакатлари бўйича президенти Франс ван Дюрсен ва Канаданинг қазилма хом-ашёларга ихтисослашган «B2gold» компанияси вице-президенти Нил Ридер нутқ сўзлади.

Улар Ўзбекистонда давлат раҳбари бошчилигида олиб борилаётган мамлакатни барқарор ривожлантиришга, иқтисодиётни либераллаштиришга, монополияни қисқартиришга, ишбилармонлик муҳитини яхшилашга, инвесторлар ва бизнес ташаббусларини қўллаб-қувватлашга йўналтирилган ислоҳотларга юқори баҳо бердилар ҳамда булар инвесторларга «давлат номидан ишончли шерик топиш» имкониятини бериш орқали давлат ва АҚШ компаниялари ўртасида ишончли ва ўзаро манфаатли муносабатлар ўрнатишда муҳим аҳамият касб этишини қайд этдилар, дейилади ТИВ хабарида.