Ҳукумат Самарқанд вилояти бўйича қарор қабул қилди. Туризмда жиддий ўзгаришлар кутиляпти

“Университет” хиёбони - пиёдалар учун аллея ва туристлар дам олиши учун шароит яратиш (“Wi-Fi” зоналар, замонавий ёритиш, велойўлак ва югуриш учун йўлаклар ва бошқалар);

Ислом Каримов кўчаси - пиёдалар аллеясини миллий усулда ва ўрта асрлар руҳида ободонлаштириш;

Алишер Навоий ва Пушкин кўчалари - мусиқачилар, рассомлар, кўча актёрлари ва тез овқатланиш нуқталари билан бирга пиёдалар аллеясини ташкил этиш;

Орзу Маҳмудов кўчаси - гастрономик туризмни ривожлантириш бўйича махсус ҳудуд ташкил қилиш, хусусан, турли мамлакатлар таомлари тайёрланадиган овқатланиш нуқталарини ташкил қилиш ва уларни тунги вақтда ҳам ишлашини таъминлаш.

Ўзбекистон Республикаси Туризмни ривожлантириш давлат қўмитаси уч ой муддатда Самарқанд шаҳридаги асосий кўчаларда туризм инфратузилмасини ташкил этиш бўйича мастер-режалар ишлаб чиқилишини таъминлайди.

Самарқанд вилояти ҳокимлиги мастер-режалар ишлаб чиқилганидан сўнг бир ой муддатда уларни хусусий инвесторларнинг энг яхши таклифларини белгиланган тартибда танлаб олиш ва муҳандислик ҳамда коммуникация тармоқларига улашни таъминлаш орқали амалга оширилишини таъминлайди.

Ўзбекистон Республикаси Туризмни ривожлантириш давлат қўмитаси, Ўзбекистон Фанлар академияси, Маданият вазирлиги ва Самарқанд вилояти ҳокимлигининг:

Амир Темурнинг “Боғи баланд” ва “Боғи Шамол” боғлари жойлашган жойини аниқлаш opқали хусусий инвесторларни жалб қилган ҳолда, уларни қайта ташкил этиш ва тарихий қиёфасини қайта тиклаш;

Ўзбекистон Республикаси Туризмни ривожлантириш давлат қўмитаси ҳузуридаги бюджетдан ташқари Туризм соҳасини қўллаб-қувватлаш жамғармаси ҳисобидан Амир Темурнинг 12 та боғи ҳақидаги ахборотни улар жойлашган жойи, ҳар бир боғнинг хусусиятлари, майдони, яратилиш тарихини ёритувчи интерфаол хариталар ишлаб чиқиш;

Самарқанд вилояти маҳаллий бюджети ва Ўзбекистон Республикаси Маданият вазирлиги ҳузуридаги Маданият ва санъатни ривожлантириш жамғармаси ҳисобидан ЮНЕСКО билан келишилган ҳолда, "Шероз қалъа” (Булунғур тумани), “Добусия” (Пахтачи тумани), Ревдат шаҳарчаси - Кофир қалъа (Самарқанд тумани), Афросиёб шаҳарчасидаги (Самарқанд шаҳри) археологик ёдгорликларни реставрация қилиш;

археологик ёдгорликлар ҳудудида давлат-хусусий шериклик шартлар асосида “очиқ осмон остидаги” музейларни ташкил қилиш ва ташриф буюрувчиларни электрон ҳисобга олиш тизимларини жорий этиш, қурилиш ишларини амалга оширмасдан санитария-гигиена пунктларини, шунингдек, сувенир маҳсулотлар сотилишини ташкил қилиш.

Тажриба сифатида уч йил муддатга шундай тартиб ўрнатиладики, унга кўра 2020 йил 1 январдан;

а) Ўзбекистон Республикаси Туризмни ривожлантириш давлат қўмитаси ҳузуридаги бюджетдан ташқари Туризм соҳасини қўллаб-қувватлаш жамғармаси ҳисобидан Самарқанд вилояти маданий мерос объектлари ва меъморий ёдгорликларига кириш жойларига электрон ҳисоблаш тизимларига эга замонавий турникетлар танлов асосида сотиб олинади, монтаж қилинади ва ўрнатилади;

б) Самарқанд вилоятининг маданий мерос объектлари ва меъморий ёдгорликлари объектларида чипталар айланмасининг ягона электрон тизими асосида электрон билетлар сотилишидан тушган пул маблағларини тақсимлаш механизми жорий этилади, унга кўра 2018 йил якунлари бўйича тушган маблағлар, ушлаб қолиниб, баланс сақловчилар ҳисоб-рақамларига йўналтирилгандан сўнг қуйидаги тартибда тақсимланади:

25 фоизи - Ўзбекистон Республикаси Маданият вазирлиги ҳузуридаги Маданият ва санъатни ривожлантириш жамғармасига объектни реконструкция ва реставрация қилиш бўйича чора-тадбирларни молиялаштириш учун;

25 фоизи - баланс сақловчиларнинг ҳисоб-рақамига объект ҳудудида ободонлаштириш ишларини ўтказиш ва қулай шароитлар яратиш учун;

50 фоизи - Ўзбекистон Республикаси Туризмни ривожлантириш давлат қўмитаси ҳузуридаги Туризм соҳасини қўллаб-қувватлаш жамғармасига Самарқанд вилоятининг туризм салоҳиятини намойиш этиш учун;

Ўзбекистон Республикаси Туризмни ривожлантириш давлат қўмитаси тажриба якунлари бўйича уч ой муддатда ушбу механизмни республиканинг бошқа ҳудудларидаги маданий мерос объектлари ва меъморий ёдгорликларида жорий этишнинг мақсадга мувофиқлиги тўғрисида Ўзбекистон Республикаси Вазирлар Маҳкамасига таклиф киритади.

Самарқанд вилояти ҳокимлиги Ўзбекистон Республикаси Туризмни ривожлантириш давлат қўмитаси, Қурилиш вазирлиги, Инвестициялар ва ташқи савдо вазирлиги билан биргаликда қуйидагилар назарда тутилган таклифни икки ой муддатда ишлаб чиқади ва Ўзбекистон Республикаси Вазирлар Маҳкамасига киритади:

Самарқанд вилоятининг эшкак эшиш каналига туташ ҳудудни замонавий комплекс инфратузилма ва туристик зоналар, шу жумладан дам олиш зоналари, меҳмонхоналар, болалар майдончалари, сузиш ҳавзаларини яратиш билан биргаликда реконструкция қилиш;

“Имом Ал-Бухорий" мажмуасига туташ ҳудудларни туризм инфратузилмасини қуриш, шунингдек, зиёратчилар ва туристлар учун қўшимча қулайликлар, шу жумладан “ҳалол” стандарт бўйича умумий овқатланиш объектлари, диний маросимлар ва дам олиш учун жойлар яратиш билан биргаликда ривожлантириш;

“Алпомиш“ заводи (собиқ “Красный двигатель”) ҳудудида замонавий дам олиш ва кўнгилочар индустрияга эга “Туристик маркази”ни фақат ЮНЕСКОнинг розилиги олингандан сўнг ташкил этиш.

Ўзбекистон Республикаси Инвестициялар ва ташқи савдо вазирлиги Самарқанд вилоятида туризм инфратузилмаси объектларини ривожлантиришга қаратилган устувор инвестиция лойиҳаларини амалга ошириш учун тижорат банкларига халқаро молия институтларининг 100 миллион АҚШ доллари миқдоридаги кредит линияларини жалб қилиш масаласини икки ой муддатда ишлаб чиқади.

Ўзбекистон Республикаси Транспорт вазирлиги:

а) Туризмни ривожлантириш давлат қўмитаси билан биргаликда икки ой муддатда:

истиқболли йўналишлар бўйича мавжуд туризм эҳтиёжидан келиб чиқиб, хорижий авиакомпаниялар билан янги авиақатновлар очиш тўғрисида музокаралар ўтказиш;

маҳаллий ва хорижий туристик компаниялар буюртманомаларига асосан “Самарқанд” халқаро аэропортида хорижий туристларни ташиш учун чартер рейсларни амалга оширишни ташкил қилиш;

б) “Uzbekistan Airports” АЖ ва “Uzbekistan Airways” АЖ билан биргаликда Самарқанд шаҳрига МДҲ, ХХР, Индонезия, БАА, Бангладеш, Япония, Жанубий Корея ва Европа мамлакатларидан туристлар оқимини кўпайтириш учун авиамаршрутлар ишлаб чиқиш;

в) “Ўзбекистон темир йўллари” АЖ, Қурилиш вазирлиги ва Самарқанд вилояти ҳокимлиги билан биргаликда Самарқанд шаҳрида арқонли йўл қуриш концепциясини уч ой муддатда ишлаб чиқади ва Ўзбекистон Республикаси Вазирлар Маҳкамасига киритади.

“Регистон” ансамблини муҳофаза қилиш ва ундан фойдаланиш дирекцияси Самарқанд вилояти ҳокимлиги ва Туризмни ривожлантириш давлат қўмитаси билан биргаликда 2019 йил 1 октябрдан бошлаб:

Туризм мавсуми давомида “Регистон” комплексининг ҳар куни соат 7:00 дан (март-ноябрь) 24:00 гача иш режими ўрнатилишини;

туристлар учун туризм хизматларини монетизациялашга қаратилган тегишли хизматлар ташкил этилишини (театр шоулар ташкил қилиш, ҳаво шарида экскурсия, ансамбль тарихи ҳақида қисқа метражли фильмлар намойиши ва бошқалар);

туризм хизматларидан фойдаланиш имкониятларини ошириш мақсадида, объект ҳудудида ахборот кўрсаткич белгилари ўрнатилишини таъминлайди.

Ўзбекистон Республикаси Ички ишлар вазирлиги:

Самарқанд вилоятининг маданий мерос объектлари ва меъморий ёдгорликларига электрон чипталар бўйича кириш режимига риоя этилишини назорат қилиш ва турникетлардан ўтишда инсон омилининг бартараф этилиши;

Ўзбекистон Республикаси Миллий гвардияси билан биргаликда “Регистон” ансамблида лазерли “3D-mapping" намойиши вақтида жамоат тартибини муҳофаза қилиши ташкил этилишини таъминлайди.

Ўзбекистон Республикаси Туризмни ривожлантириш давлат қўмитаси Маданият вазирлиги ва Самарқанд вилояти ҳокимлиги билам биргаликда уч ой давомида:

мавсум бўлмаган даврда (20 ноябрдан 20 февралгача) республика фуқаролари учун нарх белгилаш қайта кўриб чиқилиши ва чегирмалар тизимини жорий этиш;

Самарқанд шаҳрининг маданий мерос объектлари ва меъморий ёдгорликларнинг соат 22:00 гача ишлашини таъминлаш орқали иш вақтини қайта кўриб чиқиш бўйича чоралар кўради.