Шу кунларда ижтимоий тармоқда аёллар ва болалар кимнингдир қабрини тавоф қилаётгани, зиналарга бош қўйиб, сажда этаётгани тасвирланган видео тарқалди.
Azon.uz сайтининг You tube каналига жойлаштирилган видеолавҳа Тошкент вилояти Паркент туманидаги Заркент қишлоғида жойлашган «Заркент бобо» зиёратгоҳида олингани айтилган.
Лавҳада вояга етмаган болалар ҳам катталар ортидан турли ҳаракатларни такрорлаётганини кўриш мумкин.
Видеолавҳани суратга олган шахс бу амаллар энг катта гуноҳ бўлмиш ширк экани, ислом динига зидлиги, диндан узоқлашиш, исломнинг асл моҳиятини англамаслик оқибатида келиб чиқаётгани, бундай амаллар касофатидан юртимиздан барака кўтарилаётгани, тоғлардаги булоқлар қуриб қолаётгани ҳақида гапирган.
«Бунақасини қаерда кўргансиз? Бундан ортиқ ширк борми? Ҳар бир зинага бош қўйиб, сажда қилишяпти», — дейди у.
Ҳолат юзасидан юзасидан «Шайх Зайниддин» жоме масжиди имом хатиби Яҳё Абдураҳмонов ўз фикрларини билдириб ўтди.
«Аҳли сунна вал жамоанинг зиёрат борасидаги эътиқоди бўйича у умуман рад қилинмайди, шунингдек ибодат масканига ҳам айлантирилмайди. Ҳозирда баъзи инсонлар зиёратгоҳларга бориб фарзанд, бойлик, дунё ва бошқаларни сўрашни урфга айлантирмоқда.
Пайғамбаримиз соллаллоҳу алайҳи ва саллам шундай марҳамат қилганлар: «Қабрларни зиёрат қилинглар. Сабаби у ер охиратни эслатади». Биз оламдан ўтган ота-боболаримиз бўладими, азиз аҳли илмлар бўладими ёинки яқинларимиз бўладими — уларнинг зиёратига боргандаги эътиқодимиз шу бўлиши керак. Уларнинг ёнларига борганда Қуръон тиловат қилиш орқали менинг ҳам фарзандларим мана шундай инсон бўлсин, дея Аллоҳ таолодан сўраш мумкин. Иккинчи бир томони, бойнинг ҳам, камбағалнинг ҳам — барчанинг келадиган жойи шу экан-да, деб инсон ўзига хулоса қилиши лобуд.
Бугун афсуслар билан айтишимиз керакки, ижтимоий тармоқларда тарқалаётган Паркент туманида бўлган ҳодиса, яъни инсонлар ёш болалар билан бирга ўша зиёратгоҳни Аллоҳнинг уйи бўлмиш Каъбатуллоҳдек тавоф қилиши, устун ва зиналарни ўпиши бизнинг динимизда тақиқланган ширк деб аталмиш ёмон амалнинг ўзи ҳисобланади», — деди Яҳё Абдураҳмонов.
