Парижда экстремизмга алоқадорликда гумонланаётган 30га яқин полициячи текширилмоқда

Экстремизмга алоқадорликда гумонланаётган 27 полициячидан уч нафари ишдан вақтинча четлаштирилган, иккитаси эса суриштирув якунига қадар табель қуролларини топширишга мажбур бўлган.

Париж полиция префектураси раҳбарияти экстремистик қарашларга эгаликда гумон қилинаётган 30га яқин полициячини текширмоқда. 

BFMTV телеканалининг хабар беришича, октябрь бошидан буён ҳуқуқни муҳофаза қилиш органлари ходимлари орасида радикаллашув белгиларини аниқлаш бўйича маълумотлар тўпланмоқда.

Экстремизмга алоқадорликда гумонланаётган 27 полициячидан уч нафари ишдан вақтинча четлаштирилган, иккитаси эса суриштирув якунига қадар табель қуролларини топширишга мажбур бўлган.

3 октябрь куни Парижда 45 ёшли полициячи 4 нафар ҳамкасбини пичоқлаб ташлаганди. Оқибатда уларнинг барчаси ҳалок бўлган.

Прокурор Жан-Франсуа Рикарнинг айтишича, қотил полициячи радикал салафийлар билан алоқада бўлиб турган. 

Париж полициясининг разведка бўлимида электроника бўйича мутахассис бўлиб ишлаган бу ходим жуда кўп разведка маълумотларини билгани ва катта эҳтимол билан уларни радикал гуруҳлардаги шерикларига етказиб тургани ҳам истисно қилинмаяпти. Қотилликни амалга оширган куни у кўплаб радикал кайфиятдаги хабарлар қолдиргани аниқланди.