Шимолий кореялик аёл футболчилар Олимпиада-2020’да иштирок этишдан бош тортишди  

Футбол бўйича Шимолий Корея аёллар терма жамоаси Жанубий Кореянинг Чежу шаҳрида ўтадиган Осиё конфедерациясининг 3-саралаш раундида иштирок этишдан бош тортди. Бу ҳақда Yonhap ахборот агентлиги хабар берди. 

Шимолий Корея вакилалари 3-9 ферваль кунлари А гуруҳида Жанубий Корея, Вьетнам ва Мьянма терма жамоалари билан ўйнашлари керак эди. Бироқ шимолий кореяликларнинг “ҳе йўқ, бе йўқ” бундай қарорга келиши сабабли ташкилотчилар уларнинг ўрнига янги терма жамоа қидирмайдиган бўлдилар ва Олимпиадага йўлланма 3 жамоа ўртасида ўйналади.

Хитойнинг Уханида эса В гуруҳи ўйинлари бўлиб ўтади. Бу гуруҳда Австралия, Хитой, Таиланд ва Тайван беллашади.

Олимпиадада 12 та аёллар терма жамоаси иштирок этади. Айни вақтда Токиода ўтадиган ўйинларга Япония, Бразилия, Янги Зеландия, Буюк Британия, Голландия ва Швеция терма жамоалари саралаб олинди. Осиё вакилалари эса иккита йўлланма учун курашадилар.