Помпео АҚШ билан муносабатларни мустаҳкамлашдаги фаоллиги учун Мирзиёевга миннатдорлик билдирди

АҚШ давлат котиби Майкл Помпео Тошкентда президент Шавкат Мирзиёев қабулида бўлгач, Ўзбекистон етакчисига миннатдорчилик изҳор қилди.

«АҚШ ва Ўзбекистон ўртасидаги стратегик ҳамкорликни босқичма-босқич мустаҳкамлаб бориш йўлидаги етакчилигингиз учун ташаккур. Мен Ўзбекистоннинг эркинроқ ва очиқроқ жамият ҳамда ҳисобдорлиги ортиб бораётган ҳукумат ташкил этиш мақсад қилинган ислоҳотларга интилишини эътироф этаман», деб ёзди Помпео твиттер саҳифасида.

Давлат котиби Тошкентга ташрифидан хурсандлиги ва АҚШ-Ўзбекистон алоқалари янада мустаҳкамланишини кутаётганини қўшимча қилган.

Эслатиб ўтамиз, Помпео АҚШ Давлат департаменти раҳбари сифатида Ўзбекистонга қилган илк ташрифи давомида президент Шавкат Мирзиёев, Ташқи ишлар вазири Абдулазиз Комилов, Тошкент шаҳар бош имом хатиби Нуриддин Холиқназаров ва бошқа диний фаоллар билан учрашувлар ўтказди. Шунингдек, «C5+1» шаклидаги йиғилишда Марказий Осиё республикалари ташқи ишлар вазирлари билан мулоқот қилди.