Талабаларга тўланадиган янги стипендия тизими орқали олий таълимдаги коррупцияни тугатиш режа қилинган, - дея маълум қилди Олий ва ўрта махсус таълим вазири ўринбосари Сарвар Бузрукхонов.
7 февраль куни Тошкент шаҳридаги «Талабалар медиа ижтимоий ва маданият маскани» биносида Олий ва ўрта махсус таълим вазирлиги томонидан ўтказилган матбуот анжуманида стипендия тўлашнинг янги тартиби муҳокама қилинди.
Матбуот анжуманида журналистлар томонидан стипендия тўлашнинг янги тартиби бўйича 30 фоиз фанлардан 3 баҳо олган талаба семестр давомида стипендия олмаслиги, бу ҳолатда 3 баҳо олмаслик учун ҳам айрим талабалар томонидан барибир коррупцияга йўл қўйилиши мумкинлиги борасида савол берилди.
Саволга дастлаб Тошкент давлат иқтисодиёт университети ректори Қўнғиротбой Шарипов жавоб берди.
Унинг айтишича, университетда охирги семестрда синовдан ўтказилган тизим бўйича якуний имтиҳонларда ўқитувчи ва талаба ўртасидаги боғлиқлик узилади ва қисман коррупциянинг олди олинади.
«Иқтисодиёт университетида бир тизимни йўлга қўйдик. Бунда имтиҳонларда тушадиган барча тест саволлари талабаларга олдиндан етказилди. Яна бир ўзгариш: талабалар якуний имтиҳонларни онлайн тарзда тест марказларида топширди.
Бу жараёнда ўқитувчилар қатнашмайди. Тест жараёнини назорат қилувчи назоратчилар эса университетнинг ўзидан бўлмайди. Талабаларда тест жараёнига нисбатан эътирозлар бўлса, тест жараёни якунида қайта имтиҳон қилдик.
Бу жараёнда талаба ва профессор, ўқитувчи алоқаси бўлмайди. Бу жараён якуний имтиҳонларда коррупция ҳолатларининг олдини олиш имкониятини беради», — деди у.
Савол юзасидан, шунингдек, Олий ва ўрта махсус таълими вазири ўринбосари Сарвар Бузрукхонов ҳам ўз фикрларини билдирди.
«Бу янги тизимни жорий қилиш учун кўпчилик меҳнат қилди. Кўп таҳлиллар қилинди. Таҳлиллар шуни кўрсатдики, стипендия тўлаш тартиби ҳозирда фақат МДҲ давлатларидагина сақланиб қолган.
Таълим сифати бизга яқинроқ бўлган Россия Федерацияси ва Қозоғистондаги тизимни олиб кўрайлик. Бу давлатларда ҳам талабаларга стипендия тўланади аммо 3 баҳога ўқийдиганларга эмас. Улар бюджетдан стипендия олмайди», деди Бузрукхонов.
Унинг қўшимча қилишича, бугунги кунда Ўзбекистонда жами 88 минг талаба давлат гранти, 278 минг талаба эса контракт асосида ўқийди. Шунча талаба орасида давлат гранти билан ўқиётган талабалар эса албатта қолганлардан ўқиши билан фарқ қилиши керак.
Ҳукумат эса адолат ва ижтимоий ҳимоя принсипларидан келиб чиққан ҳолда бюджетдаги талабалар учун 3 баҳо олмаслик шартини 30 фоизгача қолдирган.
«Келинг, ҳолатга Миллий университетидаги математика йўналиши талабаси мисолида қараймиз. У математик, у иқтидорли бола, лекин мутахассислиги бўлмаган жисмоний маданият фанидан паст баҳо олиши мумкин. Шунинг учун, 30 фоизлик чегара қолдирилди. Лекин 3 баҳоси 30 фоиздан ошиб кетган талабага биз стипендия беролмаймиз.
Коррупция бўлмайдими, деяпсиз. Президент олий таълим соҳасини коррупциядан ҳоли соҳа, деб эълон қилган.
Биз тизимда коррупцияни йўқотиш бўйича барча чораларимизни қўллаяпмиз. Бизга талабаларни ўзи ҳам ёрдам бериши керак.
Бу йилдан бошлаб биз барча олий таълим муассасаларида талабалар кенгашларини тузяпмиз. Стипендия белгилашнинг янги тизими бўйича мана шу кенгашнинг ўрни оширилади. Бу кенгаш Ёшлар иттифоқидан алоҳида орган ҳисобланади.
Талабаларни рағбатлантириш ва қўшимча стипендия белгилашдаги асосий ваколатлар ҳам мана шу кенгаш қарори билан бўлади.
Авваллари 5 ва 3 баҳога ёпган талабалар стипендияси деярли 2 баробар фарқ бўларди ва шу сабабли, талабалар 5 баҳога ёпиш учун ҳам пул кўтариб юришарди.
Ҳозир 195 минг 884 нафар талаба стипендиясиз шаклда тўлаяпти. Улар энди пул кўтариб юрмайди. Мана шу тизимга ўтганимизнинг ўзи ҳам коррупцияни катта фоизларга йўқотмоқда», дея Сарвар Бузрукхонов сўзларини келтирмоқда Kun.uz мухбири.
