Кенияда дунёдаги ягона урғочи оқ жирафа ва унинг боласи ўлдирилди

Ноёб жирафалар браконьерлар томонидан ўлдирилгани тахмин қилинмоқда. Шу тариқа, дунёда бу турнинг ягона вакили – эркак оқ жирафагина қолди.   

Жирафаларнинг суяклари улар яшаган Ишакбини Хирола қўриқхонасидан 57 км узоқликда маҳаллий аҳоли томонидан топилган.

“Бутун Кения учун бугунги кун қайғуга тўладир, чунки гап ноёб жонзотлар ҳақида бормоқда”, деб айтган қўриқхона раҳбари Муҳаммад Аҳмаднур. 

Кениянинг ёввойи табиатни қўриқлаш хизмати воқеани тергов қила бошлаган. Маълум қилинишича, қўриқхона раҳбарияти жирафалар ғойиб бўлгандан кейин қўриқлаш хизматига мурожаат қилган. Мутахассислар маълумотларига кўра, жирафалар тахминан 4 ой олдин ўлдирилган. 

Урғочи оқ жирафа Кенияда 2017 йилда аниқлаган. Илмий тадқиқотлар ушбу жирафанинг антиқа рангдалиги албинизм оқибати бўлмай, балки ташқи қоплама пигментациясининг қисман йўқолиши ва оқ доғлар ҳосил бўлиши билан намоён бўлувчи ўзига хос мутация эканини кўрсатган.   

Кейинроқ урғочи жирафа 2 та бола туққан. Шундан кейин олимлар бу жирафалар кўпайишиб, жирафаларнинг янги тури пайдо бўлишига умид қилишган.

Оқ жирафалар бунгача Танзания ва Эфиопияда ҳам аниқланган, бироқ улар ҳам браконьерлар қўлидан нобуд бўлган.