S7 асосчиларининг қизи авиакомпания директорлар кенгаши раиси лавозимини эгаллади

Бу ҳақда Татьяна Филеванинг ўзи Forbes нашрига берган интервьюсида маълум қилган.

Татьяна Филева 32 ёшда бўлиб, авиакомпанияда 12 йилдан бери фаолият юритиб келади. У интервьюда ўзи учун ота-онаси ташкил этган авиакомпанияда фаолият юритишдан бошқа тақдирни кўрмаганини айтган. “Агар сенда ўз бизнесинг бўлса, нега бировга ишлашинг керак?”, деб айтган Филева.

Унинг айтишича, у онаси Наталия Филева 2019 йилда авиаҳалокатда ҳаётдан кўз юмгандан кейин S7 Airlines директорлар кенгаши раиси лавозимини эгаллаган. S7 Group компанияси директорлар кенгашининг собиқ раиси Наталия Филева 2019 йил 31 мартда Франкфурт-Майнда авиаҳалокатга учраганди.

“Мен компанияда анча вақт ва етарлича ишлаганман, компания ҳозирги кўринишга келишида менинг ҳиссам ҳам бор”, деб айтган Филева. Унинг айтишича, у S7 ҳамда операцион блок учун тўлиқ жавоб беради ва “бизнес муваффақиятли юритилмоқда”, шу сабабли у S7 Group’нинг катта вице-президенти ва S7 Airlines директорлар кенгаши раиси лавозимини эгаллашга “ҳақли равишда муносиб.” 

Татьяна Филеванинг таъкидлашича, онаси вафотидан кейин компаниянинг 100 фоиз акцияси унинг оиласи ихтиёрида қолган.