ДХХ Чегара қўшинлари чегараолди ҳудудда коврак ўсимлигини йиғиш билан боғлиқ масалага ойдинлик киритди

Шунингдек, қонуннинг 20-моддасига кўра, шахсларнинг чегараолди зонасига кириши, ундан чиқиши (ўтиши), у ерда бўлиши (яшаши), агар қонун ҳужжатларида бошқача тартиб белгиланган бўлмаса, ички ишлар органларининг рухсатномаси асосида, чегараолди минтақасига кириш ва ундан чиқиш (ўтиш), у ерда вақтинча бўлиш (яшаш), ҳаракатланиш ва ишлар бажариш чегара қўшинларининг рухсатномаси асосида амалга оширилади.

Вазирлар Маҳкамасининг 2018 йил 5 июлдаги 504-сонли қарори билан тасдиқланган “Ўзбекистон Республикаси ҳудудида чегара режими тўғрисида”ги Низомнинг 4-бобига кўра, чегара зонасига кириш (ўтиш), бу ерда бўлиш (яшаш), ҳаракатланиш ва ишларни амалга ошириш бўйича ички ишлар идоралари томонидан махсус карточка расмийлаштирилиб берилади.

Шунингдек, Низомнинг 44-бандига мувофиқ, юридик ва жисмоний шахслар чегараолди минтақасига киришга (бўлиш, ишларни амалга ошириш) рухсатнома олиш учун ушбу шахслар тўғрисидаги маълумотлар (фамилияси, исми, отасининг исми, туғилган санаси ва жойи, иш жойи, мутахассислиги, эгаллаб турган лавозими, яшаш жойи, шахсини тасдиқловчи ҳужжатининг серияси ва рақами, ишлар амалга ошириладиган жой, уларнинг вақти ва хусусияти) акс эттирилган ҳамда паспортларининг нусхалари илова қилинган рўйхатлар уч нусхада ариза-хатига илова қилиниб, ишлар (фаолият) бошланишидан 30 сутка аввал кечиктирмасдан Давлат хавфсизлик хизмати Чегара қўшинларининг бўлинмаларига тақдим этилади. 

Мазкур Низомнинг 45-бандига кўра, ариза-хатини йўллаган юридик ва жисмоний шахсларга чегараолди минтақасида бўлиш учун рухсатномаларни бериш қуйидаги асослар бўйича рад этилиши мумкин:

ариза-хатида ахборот тўлиқ кўрсатилмагани ёки атайлаб ёлғон маълумотлар маълум қилингани;

қайд этилган бўлиш ҳудудида (жойида) ҳарбий ва бошқа ҳаракатлар Ўзбекистон Республикаси Давлат хавфсизлик хизмати Чегара қўшинлари томонидан амалга оширилиши;

қайд этилган бўлиш ҳудудида (жойида) техноген ва табиий тусдаги фавқулодда вазият эълон қилиниши;

Ўзбекистон Республикаси Давлат хавфсизлик хизмати тегишли ҳудудий органларининг рад этиши. 

46-бандга мувофиқ, чегараолди минтақасига кириш (бўлиш, ишларни амалга ошириш) рад этилган сабаблар хат йўллаган юридик ва жисмоний шахсларга маълум қилинмайди. 

Юқоридаги ҳуқуқий-меъёрий ҳужжатларга таянган ҳолда ҳамда чегара олди ерларда ишларни амалга ошириш тартиби ўрнатилганлигини инобатга олиб, юридик ва жисмоний шахслар чегараолди ҳудудида коврак ўсимлигини йиғиш билан боғлиқ масалада, Фанлар академиясининг хулосаси, Экология ва атроф-муҳитни муҳофаза қилиш давлат қўмитаси томонидан тасдиқланган квоталарни ариза-хатига тақдим этган ҳолда ДХХ Чегара қўшинлари бўлинмаларига Давлат чегараси чизиғи яқинида ишларни амалга ошириш мақсадида тегишли рухсатнома олиш учун мурожаат қилишлари муҳимлиги маълум қилинди.