Биржада АИ-80’нинг кунлик ўртача нархлари 10,1 фоизга кўтарилган

Ўтган ҳафтада — 29 июнь–5 июль кунлари «Ўзбекистон республика товар-хом ашё биржаси» АЖнинг барча савдо платформаларида 1 трлн 78,3 млрд сўмлик товарлар сотилди ва бу аввалги ҳафтага нисбатан 3,7 фоизга камроқ.

Хусусан, ўтган ҳафтада биржа савдоларига 155 минг тонна АИ-80 маркали автомобиль бензини қўйилган ва улардан 15 957,8 тоннаси, яъни 10,3 фоизи сотилган. Ўтказилган савдоларда ҳар куни ўртача 54 харидор иштирок этган, деб ёзмоқда «Янги Ўзбекистон» газетаси.

Биржа савдоларида «Ўзбекнефтегаз» АЖ нефть базалари, автомобиль ёқилғи қуйиш шохобчалари ва бензинни ўз эҳтиёжлари учун харид қиладиган бошқа юридик шахслар иштирок этишган.

Ўтган ҳафтада бензиннинг бошланғич нархи ўртача 9 фоизга кўтарилган, шу сабабли АИ-80 маркали автомобиль бензиннинг кунлик ўртача нархлари маҳсулотнинг бир тоннаси учун 3 млн 930,3 минг сўмдан 4 млн 328,2 минг сўмгача, яъни 10,1 фоизга кўтарилган.

Бошланғич нархнинг ўсишини ҳисобга олган ҳолда АИ-80 русумли автомобиль бензиннинг ўртача ҳафталик котировкаси 12,8 фоизга кўтарилиб, бензиннинг бир тоннаси учун 4 млн 320,1 минг сўмни, АИ-91 бензинининг ўртача ҳафталик котировкаси 7,2 фоизга кўтарилиб, бензиннинг бир тоннаси учун 4 млн 781,4 минг сўмни ташкил этган.

Турли манбаларда келтиришича, автомобиль бензинининг бир тоннаси ўртача 1293-1370 литрни ташкил қилади.