Тожикистонда коронавирус тарқатганлар 10 йилгача қамалиши мумкин

Эндиликда Тожикистонда коронавирусни бошқаларга юқтирганлар 5-10 йилгача қамалиши мумкин. Бу ҳақда маҳаллий «Азия-Плюс» нашри хабар берган.

Манбада айтилишича, мамлакат президенти Имомали Раҳмон 4 июль куни жиноят кодексининг 207-моддасига киритилган тузатишларни имзолаган. Унга кўра, эндиликда эпидемиологик нормаларни бузиб, коронавирусни бошқаларга юқтиришга сабабчи бўлганлар 5 йилгача озодликдан маҳрум қилиниши мумкин. Агар вирус юқтирган одам кимнингдир саломатлиги жиддий ёмонлашишига сабаб бўлса, қамоқ жазоси 10 йилгача оширилади.

Тожикистон жиноят кодексининг 207-моддасида инфекцион касалликларни юқтириш учун жазо мавжуд эди, эндиликда бу моддага ўзгартириш киритилди ва тўлдирилди. Тузатишга кўра, жамоат жойида ниқобсиз юрганлар 290 сомонигача (28 доллар) жаримага тортилиши мумкин. Коронавирус ҳақида ёлғон маълумот тарқатганлик учун жисмоний шахслар 580 сомони (56 доллар), юридик шахслар эса 11 600 сомони (1 126 доллар) миқдорида жаримага тортилади.

Тожикистон жиноят кодексига киритилган бу ўзгаришлар ҳукумат нашрларида эълон қилингач, расман кучга киради.

Маълумот учун, айни дамда Тожикистонда коронавирус юқтирганлар сони 6 213 нафарни ташкил этмоқда. Улардан 4 858 нафари тузалган бўлса, 53 киши вирус қурбонига айланган.

Тайёрлаган: Ўткир Жалолхонов

#Тожикистон #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.