“Формула-1”нинг Баҳрайнда ўтган иккинчи пойгаси – Саҳир гран-присида Racing Point жамоаси вакили, мексикалик Серхио Перес ғалаба қозонди. Эътиборлиси, ушбу ғалаба пойгачининг узоқ йиллик фаолиятидаги биринчиси бўлди.
“Менда сўз йўқ. Умид қиламанки, бу туш эмас, мен бу лаҳзани узоқ вақт орзу қилгандим. Бунга менда 10 йил кетди. Биринчи айланадан кейин мен учун пойга якунланди деб ўйлагандим, бироқ таслим бўлишни истамадим. Келгуси фаолиятимга тўхталсак, мен уни давом эттирмоқчиман, бироқ бу энди менинг қўлимда эмас. Агар 2021 йилда “Формула-1”да бўлмасам, 2022 йилда унга қайтаман”, деб изоҳ берган ўз ғалабасига Перес.
Пойгада 2-ўринни Renault аъзоси Эстебан Окон, 3-ўринни Racing Point’нинг яна бир вакили Лэнс Стролл эгаллади.
Аввалроқ британиялик пойгачи Люис Ҳэмилтон ушбу мавсумда муддатдан олдин чемпионликни расмийлаштириб қўйганди. У пойгаларнинг 7 карра чемпионига айланиб, бу борада афсонавий немис пойгачиси Михаэл Шумахер рекордини такрорлади. Бироқ Люис Баҳрайндаги пойгада коронавирусга чалингани сабабли иштирок эта олмаган.
11-13 декабрда Абу-Дабида пойганинг сўнгги босқичи бўлиб ўтади.
