Францияда Huawei компаниясининг 5G қурилмаларидан фойдаланиш тақиқланиши қонуний деб топилди

Франция конституцион кенгаши Huawei компаниясининг янги авлод 5G мобил тармоғи қурилмаларидан фойдаланиш чекланишини конституцияга мувофиқ деб топди. 

Кенгашнинг билдиришича, телекоммуникация операторлари 5G тармоғи учун мўлжалланган мобил терминаллар ва бошқа қурилмалардан фойдаланиш учун миллий регулятордан рухсатнома олишлари шарт.

Конституцион кенгаш ўз қарорини миллий хавфсизлик ва мудофаа манфаатлари нуқтаи назаридан изоҳлаган. 

 Қайд этилишича, мобил алоқанинг радиотехник тармоқларидан жосуслик, маълумотларни ўғирлаш ва коммуникация тизимларини ишдан чиқаришда фойдаланилиши мумкин.

Францияда ўтган йил августида Huawei компаниясининг уч мингта антеннасини демонтаж қилишга қарор қилинганди.

Аввалроқ АҚШ собиқ президенти Трампнинг маъмурияти Huawei компаниясини Америка давлат ташкилотлари, компаниялари ва фуқаролари тўғрисида маълумот йиғишда айблаганди. АҚШдан ташқари, Буюк Британия, Швеция ва Японияда 5G тармоғини ривожлантиришда Huawei билан ҳамкорлик қилиш бутунлай тақиқланган.