Алишер Усмоновга тегишли компания Ўзбекистон ёқилғи-энергетика комплексини рақамлаштиришда иштирок этади

11 февраль куни энергетика вазири Алишер Султонов, энергетика компаниялари раҳбарлари, шунингдек «ИКС Холдинг» вице-президенти Станислав Киселев ва трансформация директори Екатерина Земскова иштирокида йиғилиш ўтказилди.

«Аксарият бозорлар, шу жумладан Россия ва Ўзбекистонда ҳам ҳозирги кунда иқтисодиётнинг барча соҳалари рақамли трансформациянинг фаол босқичида. «ИКС Холдинг» вазифани муваффақиятли уддалаш учун етарли техник ечимларга эга. Бунга металлургия ва нефть қазиб олиш соҳаларида йирик саноат корхоналарини рақамлаштириш бўйича йирик лойиҳаларни амалга ошириш жараёнида тўпланган билим ва тажриба киради», – дея Станислав Киселевнинг сўзлари келтирилган компания релизида.

Маълум қилинишича, лойиҳа уч босқичда амалга оширилади:

• Ўзбекистоннинг нефть-газ ва энергетика соҳаларида фаолият юритувчи корхоналарининг ҳозирги бизнес жараёнлари ва АКТ инфратузилмасини ўрганиш;
• дунёнинг илғор тажрибаларини таҳлил қилиш ва рақамлаштириш бўйича таклифларни шакллантириш;
• саноатни рақамли ўзгартириш учун умумий йўл харитасини яратиш.

«ИКС Холдинг» ва Ўзбекистон Энергетика вазирлиги ўртасидаги шартнома 2020 йил 15 декабрда, Ўзбекистоннинг Москвадаги элчихонасида имзоланган.

Лойиҳа Энергетика вазирлиги ҳузуридаги бюджетдан ташқари тармоқлараро энергия тежаш фонди билан биргаликда амалга оширилиши белгиланган.

Маълумот учун, россиялик миллиардер Алишер Усмоновга тегишли USМ холдинг компанияси 2020 йилда «ИКС Холдинг»нинг 100 фоиз акцияларини сотиб олган. «ИКС Холдинг» таркибига бешта субҳолдингга бирлаштирилган 27та компания киради.

Аввалроқ, Алишер Усмоновга тегишли бўлган USМ Телесом ва «МегаФон» ўзбекистонлик ҳамкорлар билан биргаликда янги қўшма корхона – Дижитал Ҳолдингни ташкил этгани хабар қилинганди.