Жонс Ҳопкинс университети маълумотига кўра, пандемия даврида дунёда коронавирусга чалинганлар сони 115 миллионга яқинлашган, 2,5 миллиондан ортиқ киши ҳалок бўлган.
Twitter Яқин Шарқдаги сегмент учун коронавирус ҳақидаги текширилмаган ва чалғитувчи постларни шубҳали постлар сифатида белгиламоқда. Минтақанинг кўплаб мамлакатларида касаллик ва вакциналар тўғрисидаги ёлғон маълумотлар тарқатилиши катта муаммога айланган, уларнинг айримларида бундай ёлғон постлар учун катта жарималар ва бошқа жазо турлари жорий этилган.
Вакциналар кексалар орасида коронавирусдан ўлим даражасини пасайтирди
Pfizer ва AstraZeneca вакциналарининг биринчи дозаси қабулидан кейин 80 ёшдан ошган британияликларнинг шифохонага тушиш даражаси 80 фоизга камайган. Бу ҳақда Буюк Британия жамоат соғлиғини муҳофаза қилиш хизмати (PHE) маълумотида келтирилган.
Бу борада дунё статистикаси бироз пастроқ. 70 ёшдан ошганлар гуруҳида Pfizer вакцинасининг биринчи дозаси касалликнинг оғир шаклидан ўртача 60 фоизга ҳимоялайди, AstraZeneca эса 60-73 фоизга.
Шунингдек, Pfizer вакцинаси кекса ёшлилар ўртасида Covid-19’дан ўлимлар даражасини 80 фоизга камайтирган. AstraZeneca бўйича бундай маълумотлар ҳозирча йўқ. AstraZeneca’дан фойдаланиш Европа регулятори томонидан маъқулланган, аммо ЕИнинг кўплаб давлатлари клиник синовлар етарли бўлмагани важи билан уни 65 ёшдан ошганларга қўллашга шошилмаяпти.
Аммо сешанба куни Франция соғлиқни сақлаш вазирлиги AstraZeneca учун «яшил чироқ»ни ёқди. Француз амалдорларининг сўзларига кўра, бу препарат кекса организмга таъсир кўрсатиши ҳақида маълумотлар кўпайгани билан изоҳланади. Аммо, тиббиётчиларнинг фикрича, бу қарор бошқа вакциналар - Pfizer ва Moderna етказиб берилишидаги кечикишлар билан ҳам боғлиқ.
Ҳозирда бутун Европа бўйлаб вакциналарни етказиб беришда муаммолар кузатилмоқда, шу туфайли Франция ортидан ЕИнинг бошқа давлатлари ҳам AstraZeneca’ни ёши катталар учун қўллашга рухсат бериши кутилмоқда.
АҚШ янги таҳдид қаршисида
Шу билан бирга, бутун дунёдаги мутахассислар коронавируснинг янги штаммлари вакцинация кампаниясини хавф остига қўйиши ва мавжуд вакциналарнинг самарадорлигини сезиларли даражада камайтиришидан хавотирга тушишмоқда.
АҚШда касалланиш кўрсаткичлари бўйича яна ўсиш қайд этилди: ўтган ҳафтада янги касалланганлар сони ҳар куни ўртача 70 мингга ортган, касаллик қурбонлари сони 2 мингга.
