«Мингга яқин машина тайёр». Ўзбекистонда йиғилаётган KIA автомобиллари сотувга чиқиш арафасида

2020 йил ноябрдан бошлаб «Жиззах» эркин иқтисодий зонасидаги ADM-Jizzakh заводида учта комплектациядаги Seltos кроссовери ва бешта комплектациядаги К5 седанини йиғиш бошланиши хабар қилинганди.

Ўзбекистондаги KIA Motors автосалони савдо бўлими ходими Раҳматилла Назаровнинг Kun.uz'га маълум қилишича, айни пайтда мингтага яқин автомобил тайёр ҳолатда.

«KIA автомобилининг Seltos кроссовери ва бешта комплектациядаги K5 седан маркаларини Ўзбекистонда йиғиш бошланган. Ҳозирда мингга яқин машина тайёр. Уларга харидорлар тўлов қилишган. Автомобиллар яқин кунларда савдога чиқарилади.

Олиб келиниши режалаштирилган бошқа янги моделлар ҳақида ҳозирча маълумотлар йўқ. Машиналарга 5 йил кафолат берилади», – деди корхона ходими.

Маълум қилинишича, 31 мартга қадар машиналар мижозларга етказилади. Айни пайтда автоуловлар Жиззахдаги заводда, Тошкент шаҳрига жўнатишга тайёр турибди.

Компания вакили мижозларга биринчи галда 2021 йилнинг 25 январигача етказиб бериш шарти билан тузилган шартномалар доирасида автомобиллар етказиб берилишини қайд этди.

Ўтган йилнинг октябр ойида компания вакиллари харидорлар биринчи автомобилларини 2020 йил декабрида олишлари мумкинлигини билдиришганди. Аммо бу жараён ҳамон амалга ошмади. Roodell компанияси бош директори Дониёр Давлетияровнинг айтишича, бу кечикишнинг сабаблари яқин кунларда маълум қилинади.

«Ҳозир аниқ жавоб бера олмаймиз. Бир ҳафтадан кейин «результат» билан жавоб бермоқчимиз», – деди Давлетияров Kun.uz мухбири билан суҳбатда.

Эслатиб ўтамиз, K5 седанининг нархи 249,9 миллион сўмдан 369,9 миллион сўмгача, Seltos кроссовери 229,9 миллион сўмдан 279,9 миллион сўмгача бўлиши хабар қилинган.

Шунингдек, 2021 йил охирига қадар яна 6 та янги модел Ўзбекистонга олиб келиниши айтилган.

• Маълумот учун, KIA Motors – Жанубий Кореянинг йирик автомобил ишлаб чиқарувчи компанияларидан бири. Бугунги кунда у 8 мамлакатда 14 та ишлаб чиқариш ва йиғиш операцияларида йилига 1,4 миллиондан ортиқ автомобил ишлаб чиқаради.
• KIA автомобиллари 172 та мамлакатни қамраб олган 3000 дан ортиқ дистрибютор ва дилерлар тармоғи орқали сотилади ва хизмат кўрсатилади. Корпорация 40 мингдан ортиқ ходимга эга ва йиллик даромади 17 миллиард AҚШ долларидан ошади.