Путин 23 март куни коронавирусга қарши эмланишини маълум қилди 

Россия президентининг таъкидлашича, мамлакатда эмлаш суръатларини ошириш лозим: пандемия ортида киритилган чекловларнинг бекор қилиниши айнан шунга боғлиқ бўлади.

“Эмлаш бу ҳар бир кишининг ихтиёрий танлови, шахсий қароридир. Дарвоқе, мен ўзим буни эртага амалга оширмоқчиман”, деб айтган Путин вакцина ишлаб чиқариш ва эмлаш суръатларини оширишга бағишланган йиғилишда.

Путин қайси вакцина билан эмланмоқчилигига аниқлик киритмаган. Бироқ у Россияда ишлаб чиқилган вакциналарнинг хавфсиз эканини таъкидлаб ўтган. “Бирорта хорижий восита бундай юқори даражадаги ҳимояни намойиш қилмаяпти”, деб айтган Россия етакчиси. Кейинроқ Путиннинг матбуот котиби Дмитрий Песков президент Россия вакциналаридан бири билан эмланишини маълум қилган.

Путиннинг таъкидлашича, Россияда 6,3 млн киши вакцинанинг биринчи дозасини, 4,3 млн киши эса иккала дозасини олган. Шу тариқа, Россияда эмланганлар улуши 4,4 фоизни ташкил қилмоқда.

Россияда айни кунда учта вакцина рўйхатдан ўтказилган: Гамалея марказининг “Спутник V”, “Вектор” марказининг “ЭпиВакКорона” ва Чумаков марказининг “КовиВак” вакциналари.