Ўзбекистонда 2020 йилда манзилли дастурларга йўналтирилган 10 трлн сўмнинг 845 млрд сўми талон-торож қилинган. Бу ҳақда президент раислигидаги видеоселекторда сўзга чиққан бош прокурор ўринбосари Акмалхўжа Мавлонов маълум қилди.
Президент Шавкат Мирзиёев кўрилаётган чораларга қарамай бюджет маблағларини талон-торож қилиш ҳолатлари камаймаётганига эътибор қаратди.
«Менга «ўғирлади» деган гап жуда оғир ботади. Шахсан ўзим кимнидир қамаб юборишга буйруқ бермаганман. 25 йил қамаш билан шуғулландик, лекин коррупция йўқолмади. Энди Мавлоновга катта топшириқ, аҳоли ва ОАВ назоратини йўлга қўйиб, талон-торожликларнинг олдини олиши зарур», дея давлат раҳбарининг сўзларини келтирмоқда Kun.uz мухбири.
Мавлонов маблағлар сарфланишида онлайн назорат тизими йўлга қўйилишини, бу жараёнларга ОАВ вакиллари ҳам жалб қилинишини айтиб ўтди.
