Туркия президенти Ражаб Эрдўған рамазон ойидан кейин Шушага боришини айтди. Бу ҳақда Эрдўған видеонконференция тарзида ўтган туркий мамлакатлар ҳамкорлиги норасмий саммитида гапирган.
«Биродарим Илҳом Алиевни яна бир бор Қорабоғ учун жанглардаги ғалаба билан табриклайман. Насиб бўлса, рамазондан кейин Шушага борамиз ва бу яна бир байрам бўлади. Туркий мамлакатлар бу борада Озарбойжонни қўллаб-қувватлашда давом этиши керак», деган Эрдўған.
2020 йил 27 сентябр куни бошланиб, 9 ноябргача давом этган Озарбойжон ҳамда Арманистон ўртасидаги Қорабоғ учун урушда айнан Шушанинг забт этилиши ҳал қилувчи қадам бўлган. Ўзининг тарихий ерларини қайтариб олиш йўлида курашган Озарбойжон Шушани қайтиб олгач, Арманистон томони таслим бўлган ва Россия воситачилигида уч томонлама тинчлик шартномаси тузилганди.
Келишувга кўра, Озарбойжон бир қатор туманларни расман қайтиб олди ва уруш тўхтатилди. Ҳудуддаги тинчликни россиялик «тинчликпарвар кучлар» таъминлаши ва уларга ўнлаб турк аскарлари ҳамроҳлик қилиши айтилганди. Ўтган асрнинг 90-йилларидаги Қорабоғ учун жангларда туркий халқлар учун муҳим маданий шаҳар бўлган Шуша жиддий зарар кўрган. Айни дамда шаҳарда 4 минг атрофида одам яшайди.
Маълумот учун, Эрдўған ўтган йил 10 декабрда ҳам Озарбойжонда бўлган ва мамлакат президенти Илҳом Алиев билан бирга Қорабоғ учун урашдаги ғалаба шарафига ўтказилган ҳарбий парадда иштирок этганди. Туркия етакчиси Қорабоғдаги уруш бошланиши билан Туркия Озарбойжонга ҳар қандай ёрдам кўрсатишга тайёрлигини маълум қилган. Тахминларга кўра, Озарбойжон томони жангда зафар қучишида айнан Туркия томони тақдим этган учувчисиз дронлар ҳал қилувчи ролни ўйнаган.
