Мадагаскарда президентга қарши фитна уюштиришда гумонланиб 21 киши ҳибсга олинди

Маълумот берилишича, қўлга олинганлар орасида беш нафар генерал ҳамда тўрт нафар хориж фуқароси бор.

Андри Радзуэлина / Фото: Reuters

Мадагаскарда мамлакат президенти Андри Радзуэлинани ўлдириш мақсадида тил бириктиришда гумонланиб 21 киши, жумладан, 12 нафар ҳарбий қўлга олинди. Бу ҳақда бош прокурор Бертину Разафиаривунига асосланиб Reuters агентлиги хабар берди.

"Терговчилар фитна ташкилотчиларини аниқлаш имконини берган ишончли ашёвий далилларни қўлга киритди. Алоқадор шахслар қўлга олинди", деди у.

Агентликнинг маълумот беришича, қўлга олинганлар орасида беш нафар генерал ҳамда тўрт нафар хориж фуқароси бор. Дастлабки ҳибслар 20 июлда амалга оширилган.

Jeune Afrique нашрига кўра, фитна иштирокчиларидан бири бўлган Франция фуқароси Пол Рафанухарана аввалроқ бир неча миллион доллар беришларини сўраб Madagascar Oil компаниясига мурожаат қилган.