Шанба куни «Атлетико»дан учралган мағлубият (0:2) мухлисларнинг сабр косасини тўлдиришда давом этди.
Испания чемпионати. Ла лига. 8-тур
«Атлетико» — «Барселона» — 2:0 (2:0)
Голлар: Лемар, 23 (1:0). Суарес, 44 (2:0).
«Атлетико»: Облак, Савич, Хименес, Эрмосо (Фелипе, 81), Коке, де Пауль (Триппьер, 46), Льоренте, Лемар, Суарес (Гризманн, 72), Феррейра-Карраско (Лоди, 81), Жоау Феликс (Корреа, 72).
«Барселона»: тер Штеген, Пике, Мингеса (Пуч, 75), Араухо, Дест (Лангле, 86), Бускетс, Коутинью (Фати, 64), Ф.де Йонг, Гави (Л.де Йонг, 75), Гонсалес (Сержи Роберто, 46), Депай.
Огоҳлантиришлар: Гави, 20. де Пауль, 45+1. Коке, 78.
Ҳакам: Мартинес Мунуэра.
2 октябрь. Мадрид. «Ваньда Метрополитано» стадиони.
Мадриддаги ўйин натижасидан қатъи назар Роналд Куман «Барселона» бош мураббийлигини тарк этиши кутилаётганди. Аммо ўйин бошланишига бир неча соат вақт қолганида клуб президенти Жоан Лапорта баёнот берди: Куман Диего Симеоне жамоасига қарши ўйинда қандай натижа қайд этилса ҳам ишлашда давом этади.
Бу қарорни турлича талқин этиш мумкин: нидерландиялик мутахассис билан шартномани бир томонлама бекор қилиш учун 12 миллион евролик товон пули йўқлиги, унинг ўрнини эгаллаши мумкин бўлган мутахассис билан келишув йўқлиги, мўъжизадан умид қилиш ва ҳоказо. Аммо бу вақтда Каталонияда ёнғин давом этмоқда.
Куман яна қанча вақт қолади?
«Атлетико»га қарши ўйиндан кейин Куманнинг истеъфоси рўй берса, воқеалар ривожи ўзининг юқори нуқтасига чиққан бўларди. Ўшанда чиройли қасос тарихига гувоҳ бўлган бўлардик: Луис Суарес Тома Лемар урган биринчи голга ассистентлик қилди, кейинроқ совуққонлик билан ҳаракат қилиб «матрасчилар»нинг устунлигини мустаҳкамлади. Голидан кейин уругвайлик форвард «қўнғироқ қил» жестини намойиш этди, унинг бу ҳаракати ўтган йил ёзидаги аламли ҳайдалиш воқеаси вақтида футболчи билан боғланишга ҳам ярамаган нидерландиялик мураббийга қаратилганди.
Шунда бу ўйинни «Кадис» билан ўйиндаги қизил карточкадан кейин дисквалификация ўтаётгани туфайли трибунадан кузатган Куман стадионни сўнгги бор кўк-анорранглилар мураббийи сифатида тарк этган бўларди. Аммо у истеъфога чиқарилмади ва нидерландиялик мутахассис телефон орқали каталонияликларга «Сток Сити» режимини ёққан ҳолда» ўйнашга кўрсатмалар беришда давом этди.
Олдинда — терма жамоалар учун ажратилган танаффус, кейин — учта уй ўйини. «Валенсия», Киевнинг «Динамо»си ҳамда «Реал»га қарши ўйинлар. Бундай рақиблар жамланмаси «Барса»га ҳеч қандай яхшиликни раво кўрмаяпти. Аммо қарор қабул қилиш ҳуқуқи Лапортада қолади.
«Бу футболчиларга зарар келтирадиган уруш»
Ўйин арафасида Луис Суарес Каталониянинг Sport ва ESPN нашрларига интервью берди ва ўзининг собиқ клуби, хусусан, Куман билан муносабатларидаги янги гапларни очиқлади.
«Мен «Барселона»га кўп нарса бергандим ва ўйлайманки, бундай муносабатга муносиб эмасдим. Улар мен билан юзма-юз гаплашиб олишлари ва барчасига тушунтириш беришлари керак эди. Агар шартнома чоршанба кунигача бекор қилинмайдиган бўлса, якшанба кунги ўйинда тушишим мумкинлигини айтмасликлари керак эди», дейди уругвайлик футболчи.
Суареснинг хотиралари Куманнинг лаёқатсиз музокарачи сифатидаги портретига янги бўёқлар берди. Уругвайлик футболчининг клубдаги мақоми ва авторитети ўзига яраша бўлган, аммо Нидерландия термасининг собиқ мураббийи картинани бошқача кўрган.
«У менга 15 ёшли ўспиринга қилгандек муносабатда бўлди. Улар мени учинчи ва тўртинчи машғулот майдонларига ёлғиз шуғулланиш учун жўнатишди. Бу жуда оғриқли эди, дилим оғриди. Мен бу хўрликдан уйга йиғлаб қайтдим», дея ҳикоя қилади Суарес.
«Эль Пистолеро» Куман ва Лапортанинг муносабатларидаги беқарорлик ҳақида ҳам гапирган: «Бу уруш фақат футболчиларга зарар келтиради».
Суареснинг бу сўзлари шундоқ ҳам қийин вазиятдаги «Барселона»ни ички зиддиятлар янада мураккаблаштирганини кўрсатади. Молиявий муаммолар, ўйин ва услубдаги инқироз шахслар орасидаги низолардан келиб чиққан.
Ўсиб бораётган қарзлар
2021 йил мобайнида эринмаган одамларнинг барчаси «Барселона»даги молиявий инқирозни муҳокама қилди. Баъзида каталонлар клубининг энг ашаддий ҳейтерлари ҳам клубга нафратини сочишдан тийилди ва Лапортани қарзлари билан холи қолдиришди, у бу борада баёнот берди. Август ойида «Барса»нинг амалдаги президенти март ойи ҳолатига кўра клубнинг қарздорлиги 1,35 миллиард еврони ташкил этганини маълум қилди. Айрим нашрлар кўк-анорранглилар қайсидир компаниядан 1,5 миллиард евро миқдорида кредит олгани ҳақида хабар тарқатган маҳалда, клубнинг 2020/21 йиллар мавсуми учун молиявий ҳисоботи эълон қилинди.
Даромадлар 24 фоизга камайгани ҳолда харажатлар 19 фоизга ўсган ва зарар миқдори 481 миллион еврони ташкил этади — юмшоқ қилиб айтганда, миллиарддан ортиқ қарзни тўлаши керак бўлган клуб учун носоғлом вазият. 6 октябрь куни бош директор Ферран Ревертер молиявий натижалар ва келгуси йил бюджети тўғрисида батафсил баёнот билан чиқиш қилади. Ла Лигада маошлар миқдори учун ўрнатилган чегара туфайли «Барселона» харажатларини янада қисқартиришига тўғри келади.
Каталониядаги ёнғин шунчалик кенг қамровли ва комик эдики, клубда оловни ёғ билан ўчиришга уринган лаёқатсиз ўт ўчирувчини ишдан бўшатиш учун маблағ ёки cojones йўқ. «Ваньда Метрополитано»даги шарафсиз мағлубият — мавсум стартидаги даҳшатнинг давом этиши бўлди. Лапорта омма олдида Куманни ҳимоя қилаётган бўлса-да, бундай темпда у яқин вақтлар ичида қайси бири маъқулроқлиги бўйича қарор қилиши керак: даҳшатли якунми ёки якунсиз даҳшат?
Манба: «Спортс-Экспресс»
