Халқ таълими вазирлиги расмий каналига таянган ҳолда қатор етакчи ОАВлар, жумладан Kun.uz сайтида ҳам оҳангаронлик 11-синф ўқувчиси Камолиддин Акбаралиев Қозоғистоннинг Нур-Султон шаҳрида МДҲ давлатлари ўртасида ўтказилган «Йилнинг энг яхши ёш олими – 2021» халқаро танловида таълим йўналиши бўйича 1-ўринни қўлга киритгани ҳақида хабар берилганди.
«Йилнинг энг яхши ёш олими – 2021» халқаро танловида МДҲ давлатларидан 1000 нафарга яқин иштирокчилар қатнашган бўлиб, улардан 100 нафарга яқин иштирокчиларнинг илмий ишлари танлов учун саралаб олинган.
Иштирокчиларнинг 50 нафари фан, таълим, сиёсат, биология, кимё, тилшунослик ва бошқа йўналишлар бўйича ғолиб деб топилган. Ушбу танловда Ўзбекистондаги мактаб ўқувчилари учун аниқ ва гуманитар фанлар бўйича IT асосида таълим бериш бўйича тайёрлаган илмий ишим билан иштирок этишди. Камолиддин Акбаралиев халқаро танловда юқори натижани қўлга киритиб, кўкрак нишони ва диплом билан тақдирланди», – дейилганди хабарда.
Бу борада суриштирув ўтказган Rost24.uz сайти мазкур дипломлар аслида сохта экани ҳақида ёзди.
«Ўтган икки йилдан бери кўплаб талабалар «Bobek» номли умуммиллий ҳаракат (Қозоғистон) томонидан берилаётган Мустақил Давлатлар Ҳамдўстлигининг «Энг яхши ёш олими» мақоми, кўкрак нишони ва биринчи даражали дипломларини кўз-кўз қилишаётганининг гувоҳи бўляпмиз. МДҲнинг «Энг яхши ёш олим»лари ёмғирдан кейин чиққан қўзиқориндек кўпайдики, уларнинг қайси бири аслида энг яхшиси?» деган табиий савол туғилади. Маълумотларни таҳлил қилсангиз, бир йўналишда қатнашган бир неча талабанинг ҳаммаси «Йилнинг энг яхши ёш олими – 2021» дипломини олишганига гувоҳ бўласиз.
Бу танловда қатнашиб, «ғолиб» бўлганлар билан суҳбатлашилганда, улар 50-70 АҚШ доллари атрофида пул беришгани аниқланди. Бу ҳақда Андижон давлат университети тадқиқотчиси, тарихчи Шарофиддин Ҳошимжонов ўз тажрибасида бўлган воқеадан мисол келтирди:
- Аввал Андижон давлат университети ахборот хизматида ишлар эдим. Июнь ойида бир талабамиз МДҲда «Йилнинг энг яхши ёш олими» деб топилгани ҳақида хабар қилишди. Ижтимоий тармоқларда эълон қилдик. Ҳаммаси шундан кейин бошланди. Кетма-кет шу танловда ғолиб бўлган талабалар ҳақида хабарлар кела бошлади, ҳаммасининг илинжи бир, университет расмий саҳифаларида эълон қилиш керак. Шундан сўнг ўйланиб қолдик ва текширишга қарор қилдик. Билдикки, ўзимизнинг талабаларимиздан бири уларнинг кўпига ўртада туриб ушбу «медал»ни пулга олиб беряпти. У ҳар бир номзоддан 65 АҚШ долларидан олиб, 50 АҚШ долларини тўлов учун, ўзига 15 АҚШ долларини хизмат ҳақи учун олиб қолган», дейилган
