Ўзбекистон ҳудудида 2018-2021 йиллар давомида жами 19,8 трлн сўм маблағлар ҳисобига 45,3 минг кмдан ортиқ умумий фойдаланишдаги автомобиль йўллари ва хўжаликлараро ички йўлларда қуриш, реконструкция қилиш, таъмирлаш ва сақлаш ишлари олиб борилди.
Иқтисодий тараққиёт ва камбағалликни қисқартириш вазирлиги ахборот хизмати хабарига кўра, А-380 «Ғузор-Бухоро-Нукус-Бейнеу» автомобиль йўлининг 125 км қисми реконструкция қилинди, А-373 «М-39 автойўли-Гулистон-Бўка-Ангрен-Қўқон ва Андижон орқали-Ўш» автомобиль йўлининг Қамчиқ довонидан ўтган 58 км қисми цементбетон қоплама қурган ҳолда реконструкция қилинди.
Шунингдек, М-39 «Олмаота-Бишкек-Тошкент-Термиз» автомобиль йўлининг 115 км қисми асфальтбетон қоплама қурган ҳолда реконструкция қилинди, А-373 «Тошкент-Ўш» автомобиль йўлининг 208-274 км қисмини айланиб ўтишда Сирдарё дарёси устига 250 пм узунликдаги кўприк қурилди, Тошкент вилоятининг Қибрай ва Юқори Чирчиқ туманларидан ўтувчи 19,2 км узунликдаги янги йўналишдаги автомобиль йўли қурилди.
Соҳага халқаро молия институтлари, жумладан Осиё тараққиёт банки, Жаҳон банки, Саудия тараққиёт жамғармаси ва Кувайт араб иқтисодий тараққиёт жамғармаси ҳамда Ислом тараққиёт банки маблағлари республиканинг халқаро коридорларини реконструкция қилишга фаол жалб этилиб, 2018-2021 йиллар давомида 339,7 млн доллар маблағ ўзлаштирилиб, 497 км узунликдаги умумий фойдаланишдаги автомобиль йўллари цементбетон қоплама билан реконструкция қилинди.
