Японияда экрандаги таом таъмини узатувчи телевизор ишлаб чиқилди

Япониянинг Мэйдзи университети профессори Гомей Миясита экранида намойиш қилинувчи таомнинг таъмини узата олувчи телевизор прототипини ишлаб чиқди. Бу ҳақда The Guardian нашри хабар берди.

Миясита бунинг учун Taste the TV (Телевизорни татиб кўр) деб номланган қурилма яратган. У турли ароматизаторлардан иборат 10 та тюбикни ўз ичига олган. Ушбу “таъмлар” аралаштирилиб, телевизорда кўрсатилувчи таом таъмини ҳосил қилади. Сўнгра олинган таъм суюқлик кўринишида телевизор экрани устидаги гигиеник плёнкага суртилади. Таом таъмини ҳис қилиш учун эса плёнкани ялаш керак бўлади.      

“Бундан мақсад одамларга уйда қолган ҳолда ўзларини гўёки дунёнинг нариги бурчагидаги ресторанга ташриф буюргандек ҳисни беришдан иборат”, деб айтган лойиҳа муаллифи.     

Япониялик профессор 30 нафар талабадан иборат жамоа билан биргаликда ишлаб, таъм билан боғлиқ кўплаб қурилмаларни ишлаб чиқишган. Taste the TV’ни яратиш учун жамоага бир йил вақт талаб этилган. Олимнинг таъкидлашича, агар у қурилманинг сотувга мўлжалланган версиясини ишлаб чиқаришни йўлга қўйса, унда истовчилар уни 100 минг йендан сотиб олишлари мумкин бўлади. 

Миясита келгусида ошпазликка масофадан ўргатувчи дастур ҳамда таъм билан боғлиқ ўйинлар ва викториналарни ишлаб чиқишни режалаштирмоқда.