Республикада ишлаб чиқарилган янги электромобилларни сотиб олганлик учун йиғим тўлаш бекор қилинади 

Ўзбекистонда электромобиллар ишлаб чиқариш ва улардан фойдаланишни рағбатлантириш режалаштирилмоқда. Бу 2022–2026 йилларга мўлжалланган тараққиёт стратегиясини 2022 йилда амалга ошириш бўйича “Йўл харитаси” лойиҳасида белгиланган.

Хусусан, электромобиллар ишлаб чиқариш ва улардан фойдаланишни рағбатлантириш тизими яратилади. Бунда:

• электромобиллар ва уларнинг асосий таркибий қисмларини тажриба-экспериментал усулда ишлаб чиқариш базасини ташкил этиш ва уларнинг асосий бутловчи қисмларини ишлаб чиқаришни ташкил этиш;
• республикада ишлаб чиқарилган янги электромобилларни сотиб олганлик учун йиғимни тўлашдан озод этиш;
• республикада ишлаб чиқариладиган электромобиллар (шу жумладан машина-тўпламлар) утилизация йиғимини тўлашдан озод этиш кўзда тутилган.

Электромобиллар соҳасини стандартлаштириш ва мувофиқликни баҳолаш соҳасида қабул қилинган ва халқаро стандартлар билан уйғунлаштирилган стандартларни автосаноат тармоғи корхоналари томонидан бевосита ўз ишлаб чиқариш жараёнларига жорий этишни таъминлаш ҳам кутилмоқда.

Бундан ташқари, электромобилларни қувватлантириш станциялари тармоғи яратилади ва ривожлантирилади. Бунда, республикада фаолият юритаётган АГТҚШ, АЁҚШларда, аҳоли кўп йиғиладиган объектлар ҳудудларида электр қувватлантириш, шу жумладан қайта тикланувчи энергия манбалари ёрдамида қувватлантириш станциялари ўрнатилади ва бунда маҳаллий ишлаб чиқарувчилардан сотиб олиниши назарда тутилади.

Шунингдек, республика ҳудудида электр транспорт воситалари учун электр қувватлантирувчи ускуналар ва уларнинг таркибий қисмларини ишлаб чиқариш ташкил қилинади.