Eurosport телеканалида Ўзбекистон велоспорт жамоасининг рекламаси намойиш этилмоқда

Дунёнинг машҳур ва етакчи телеканалларидан бири Eurosport'да яна бир реклама кампанияси старт олди. Эътиборли жиҳати мазкур рекламадан Ўзбекистоннинг велоспорт бўйича профессионал жамоаси, яъни “Tashkent City Professional Cycling Team”га оид лавҳалар ўрин олган.

Пойтахтимиз кўчаларида суратга олинган 5 ва 15 сониялик реклама роликлари Европа, яқин шарқ ва Россия каби 50 дан зиёд мамлакатларда турли тилларда намойиш этилмоқда. Бу эса, нафақат велоспорт ва соғлом турмуш тарзини тарғиб қилиш балки, Ўзбекистоннинг туризм салоҳиятини юксалтиришга туртки бера олади. Негаки, кадрларда пойтахтимизнинг кўрки ҳисобланган иншоотлар, хусусан, Toshkent City замонавий бизнес маркази каби йирик объектлар намойиш этилмоқда.

Маълумот учун, реклама кампанияси 26 февралга қадар давом этиб, бу вақт мобайнида Пекиндаги қишки Олимпия ўйинлари ва 20-26 февраль кунлари БААда бўлиб ўтадиган велотур баҳсларини қамраб олади. Мазкур видеороликларни Eurosport'нинг ижтимоий тармоқларида ҳам кузатиш мумкин.

Шу ўринда эслатиб ўтамиз, аввалроқ велоспорт бўйича мамлакатимизнинг 3 та жамоаси UCI лицензиясини қўлга киритганди. Рўйхатдан трек йўналишидаги “Tashkent track team”, эркаклар континентал шоссе жамоаси “Tashkent City professional cycling team” ва худди шу йўналишдаги аёллар жамоаси “Tashkent city woman professional cycling team” жамоалари ўрин олган. Умумий сонларга қарайдиган бўлсак, UCI лицензиясига 142 та эркаклар жамоаси ва 42 та аёллар жамоаси эга чиққан.

Реклама ҳуқуқи асосида