Академик, педиатр-инфекционист олим Турғунпўлат Даминов вафот этди

Турғунпўлат Даминов 1941 йил Тошкент шаҳрида туғилган. 1964 йилда Тошкент тиббиёт институтини тугатган. У 1969-1982 йилларда Болалар юқумли касалликлари кафедраси ассистенти, доценти, 1982-84 йилларда мудири бўлган. 1984-1990 йилларда Соғлиқни сақлаш вазирлиги педиатрия илмий-тадқиқот институти директори, 1990 йилдан 1-Тошкент тиббиёт институти ректори бўлиб ишлаган.
 
Турғунпўлат Даминов болаларда учрайдиган гепатитнинг давомли ва сурункали хиллари шаклланишини клиник-патогенетик нуқтайи назардан ўрганган. Болаларда учрайдиган В вирусли гепатитнинг давомли хилини самарали даволаш усулини ишлаб чиққан ва амалиётга татбиқ этган. Кўпинча чақалоқлар ўлимига сабаб бўладиган нафас йўллари касалликлари белгиларини аниқлаган.

У 1997 йилдан Олий Мажлис депутати, 1995 йилда «Адолат» социал-демократик партияси сиёсий кенгашининг биринчи котиби, 1997 йилда «Ўзбекистон миллий энциклопедияси» бош таҳрир ҳайъати аъзоси бўлган.

Турғунпўлат Даминов 1980 йилда Ўзбекистонда хизмат кўрсатган врач унвони билан тақдирланган, 1997 йилда «Дўстлик» ордени билан мукофотланган.