Ўзбекистонда БМТнинг янги доимий координатори иш бошлади

Вазир Р.Астханани ушбу лавозимга тайинлангани билан табриклаб, Ўзбекистон БМТ ва унинг ихтисослашган идоралари билан конструктив ва ишончли ҳамкорлик ўрнатганини таъкидлади. Янги доимий координаторнинг касбий ютуқлари ва иш тажрибаси ушбу ҳамкорликни янада чуқурлаштиришига умид қилинади.

Кейинги йилларда Ўзбекистон билан БМТ ўртасидаги алоқалар сезиларли даражада фаоллашгани, амалий мазмун билан бойиб бораётгани таъкидланди. Мамлакат ташкилот фаолиятининг барча йўналишларидаги жараёнларнинг фаол иштирокчисига айланди. 2018-2021 йилларда президент Шавкат Мирзиёев ташаббуси билан Бош ассамблеянинг тўртта қарори тасдиқланди.

Айни пайтда Ўзбекистонда БМТ идоралари иштирокида умумий қиймати 174 миллион АҚШ доллардан ортиқ бўлган 137 лойиҳа амалга оширилмоқда.

Минтақавий хавфсизлик, Афғонистонни барқарорлаштириш ва тиклаш, замонавий таҳдид ва хатарларга қарши курашиш, оммавий қирғин қуролларини тарқатмаслик, ижтимоий-иқтисодий ривожланишга кўмаклашиш, экологик муаммоларни ҳал этиш, хусусан, Орол денгизи инқирози оқибатларини юмшатиш каби соҳаларда ҳамкорликни чуқурлаштириш истиқболлари кўриб чиқилди.