Ўзбекистон давлат санъат ва маданият институти ҳамда ТУРКСОЙ ташкилоти ўртасида меморандум имзоланди

Халқаро Туркий Маданият Ташкилоти – туркий давлатлардан ташкил топган халқаро маданият ташкилоти бўлиб, ташкилотнинг асосий мақсади – бу туркий давлатлар ва халқлар орасидаги дўстлик ва ҳамкорликни кучайтиришдир. Бу ҳамкорлик иқтисодий, маданий ва бошқа соҳаларни ўз ичига олади. Ўзбекистон билан маданий алоқаларни янада мустаҳкамлаш мақсадида Ўзбекистон давлат санъат ва маданият институти билан ўрнатилган муносабатлар муҳим ҳисобланади.

“Биз Туркиядаги бу ташкилот билан ҳамкорликда буюк шоир Муҳаммад Юсуфнинг “Сайланма” асарини турк тилида чоп эттирдик. Бу Туркияда биринчи ўзбек адибининг турк тилига ўгирилган асари бўлди. Китоб барча туркий давлатларга тарқатилди.

ТУРКСОЙ ташкилоти билан алоқаларни мустаҳкамлаш бизга барча туркий давлатлардаги маданият ва санъат таълим муассасалари билан биргаликда ҳамкорлик қилиш имкониятини беради”, деди ЎзДСМИ ректори Иброҳим Йўлдошев.

Ўзбекистон халқ шоири Муҳаммад Юсуфнинг халқаро туркий маданият ташкилоти ТУРКСОЙ томонидан нашрга тайёрланган “Muhammed Yusuf. Seçmeler” китобининг тақдимоти ҳам бўлиб ўтди.

Анжуманда Халқаро Туркий Маданият Ташкилоти бош директори Султон Раев ҳамда бош котиби ўринбосари Билол Чақижи сўзга чиқишди.

“Мақсадимиз улуғ – маданияти бир илдизга бориб тақаладиган барча туркий давлатлар маданият ва санъат йўналишидаги олийгоҳлар ўртасида кўприк бўлишдир. Маданият ва санъат олийгоҳлари талабалари учун 6 ойлик амалиётларни ташкил қилишни режалаштирганмиз.

Ўзбек тилининг отаси бўлган Алишер Навоий ижодини туркий давлатлар орасида кенг тарқатиш мақсадида ташкилотимиз Навоий мукофотини таъсис қилди. Юртингизда бундай мутафаккирлар жуда кўп: тиббиёт отаси ибн Сино, математика отаси ал-Хоразмай, астрономия отаси Мирзо Улуғбек каби улуғлар шу жумладандир”, – дея таъкидлади ташкилот директори Султон Раев.

Йиғилиш якунида ўзаро меморандум имзолаш жараёни бўлиб ўтди ва санъат усталари томонидан концерт дастури тақдим этилди.

Маълумот учун ТУРКСОЙ ташкилоти бош биноси Туркия пойтахти Анқарада жойлашган. Ҳозирги вақтда ташкилот бош директори қирғизистонлик Султон Раев ҳисобланади. Ташкилот 3 та расмий тилига эга, булар турк, рус ва инглиз тилларидир.

Ўзбекистон давлат санъат ва маданият институти Матбуот хизмати Ⓣ