Путин Индонезияда бўлиб ўтадиган G20 саммитида қатнашмайди 

Россия президенти Владимир Путин 15-16 ноябрь кунлари Балида (Индонезия) бўлиб ўтадиган G20 саммитида қатнашмайди. Унинг ўрнига Россиядан ташқи ишлар вазири Сергей Лавров иштирок этади. Буни 10 ноябрь куни Индонезия ҳукумати ҳам, Россиянинг ушбу мамлакатдаги элчихонаси ҳам тасдиқлади. Шу билан бирга, иккала томон ҳам Путин саммит доирасидаги учрашувлардан бирида онлайн тарзда иштирок этиши мумкинлигини тахмин қилди. 

Аввалроқ Индонезия расмийлари Россиянинг саммитга таклифини бошқа давлатлар томонидан босимга учраган тақдирда ҳам қайтариб олмасликларини билдирган эди. Мамлакат президенти Жоко Видодо Financial Times газетасига берган интервьюсида G20 форуми «сиёсий бўлмаслиги, унда иқтисодиёт ва тараққиёт масалалари муҳокама қилиниши керак», деб таъкидлади. Шу билан бирга, у саммит иштирокчи давлатлар ўртасидаги зиддиятнинг «жуда безовта қилувчи» кучайиши соясида қолиши мумкинлигидан хавотир билдирди.

Октябрь ойида Москва «ғалла битими»дан бир томонлама чиқиб кетганидан кейин Украина Россияни G20’дан чиқариб юборишга чақирди. Аввалроқ бу ғояни АҚШ президенти Жо Байден қўллаб-қувватлаган эди. Агар бу амалга ошмаса, у Украинани G20’га киритишни таклиф қилди. Қрим аннексия қилинганидан кейин Россия «катта саккизлик»дан чиқариб юборилган. 

Балидаги G20 саммитида АҚШ президенти Жо Байден учрашувлар чоғида Украина масаласини тартибга солиш мавзусини кўтаришга ваъда берган, шунингдек, Хитой етакчиси Си Жинпинг иштирок этади. Володимир Зеленский ҳам саммитга таклифнома олди. 3 ноябрь куни Украина президенти «Агар Россия раҳбари иштирок этса, унда Украина қатнашмайди», деди. Бироқ, 8 ноябрь куни Киев шунга қарамай, Украина президенти саммитда «қайсидир форматда» - эҳтимол онлайн тарзда иштирок этишини тасдиқлади. 

Июль ойида Индонезиянинг Бали оролида бўлиб ўтган G20 ташқи ишлар вазирларининг конференциясида Россия ташқи ишлар вазири Сергей Лавров ўзини яккаланиб қолган ва учрашувни муддатидан аввал тарк этган эди.