Сербия қуролли кучлари ва полицияси президент Александр Вучич буйруғи билан шай ҳолатга келтирилди.
Сербия қуролли кучлари Косово билан чегарада жанговар шай ҳолатга келтирилди. Бу ҳақда мудофаа вазири Милош Вучевич маълум қилди, деб хабар беради AP 26 декабрь, душанба куни.
Сербия ички ишлар вазири Братислав Гашич ҳам «полиция ва бошқа хавфсизлик кучларини тўлиқ шай ҳолатга келтиришни» ва уларни «операцион режаси»га мувофиқ армия бош штаб бошлиғи қўмондонлигига топширишни буюрганини айтди. Тегишли буйруқлар мамлакат президенти Александр Вучич томонидан берилди, деб хабар қилди республика Мудофаа вазирлиги ва Ички ишлар вазирлиги.
Мудофаа вазирининг сўзларига кўра, «бу мамлакатни Сербия қуролли кучлари томонидан Сербиянинг ҳудудий яхлитлиги ва суверенитетини ҳимоя қилиш, Сербиянинг барча фуқароларини ҳимоя қилиш ва улар қаерда яшашларидан қатъи назар, сербларга қарши террорнинг олдини олиш бўйича амалга оширилган ҳаракатларни энг юқори даражага кўтаради».
Сербия ва Косово ўртасидаги можаро шу йилнинг июль ойида, Приштина Сербия фуқароларига кириш учун вақтинчалик ҳужжатларни жорий этишга қарор қилган ва серб озчиликдан эски серб автомобиль рақамларини маҳаллий рақамларга ўзгартиришни талаб қилгандан сўнг кучайган. Косово серблари норозилик сифатида баррикадалар ўрнатдилар, шундан сўнг Приштина ҳукумати янги қоидаларни жорий этишни кейинга қолдирди.
Ноябрь ойи охирида Европа Иттифоқининг ташқи ишлар ва хавфсизлик сиёсати бўйича Олий вакили Жозеп Боррел Косово ва Сербия автомобиль рақамлари бўйича келишмовчиликни ҳал қилганини, бироқ минтақада можаролар келиб чиқишда давом этганини айтди, деб ёзади AP.
Охирги воқеа 25 декабрь куни кечки пайт Зубин Поток ҳудудида содир бўлиб, маҳаллий этник серблар икки ҳафта давомида йўлларни тўсиб қўйган. НАТО миссияси (KFOR) вакилларига кўра, уларнинг патрулларидан бирининг ёнида номаълум шахслар ўт очган, ҳеч ким жабрланмаган.
2008 йилда Косово Республикаси бир томонлама равишда Сербиядан мустақиллигини эълон қилди. Уни Европанинг кўплаб давлатлари, жумладан, Германия, шунингдек, АҚШ ҳам тан олган. Белград Косовони ўзининг автоном вилояти деб билади ва Приштина мустақиллигини тан олмайди. Сербиянинг позициясини Россия, постсовет ҳудудидаги аксарият давлатлар, шунингдек, Европа Иттифоқининг бешта давлати, Хитой ва Ҳиндистон қўллаб-қувватлайди.
