Навалний жамоаси Москва бюджетини ўзлаштириш схемасини фош қилди

Навалний жамоасининг таъкидлашича, бир қатор тарғиботчилар, шунингдек, Ксения Собчак, Алексей Венедиктов ва RTVI телеканали Москвадаги «Мой город» дастури бюджетидан пул олади.

Қамоқдаги россиялик мухолифатчи Алексей Навалний жамоаси Москва бюджети пулларининг сарфланиши юзасидан текширув олиб борди ва «шаҳар бюджетини ўзлаштиришнинг энг таъсирчан схемаларидан бири» топилганини эълон қилди. Текширув Россия пойтахтида сентябрь ойида бўлиб ўтадиган ва ҳозирги мэр Сергей Собянин учинчи муддатга қайта сайланиши кутилаётган навбатдаги сайловлар арафасида ўтказилди, деб хабар берди Россияда ёпилган Коррупцияга қарши курашиш жамғармаси («ФБК») суриштирув бўлими вакиллари Георгий Албуров ва Мария Певчих сешанба, 7 март куни. 

Суриштирув давомида улар уч йил давомида Москва мэриясининг «Мой район» ободонлаштириш дастурининг 100 000 дан ортиқ банк операцияларини ўрганишди ва Собяниннинг «қора касса»си ҳақида эълон қилишди. «Қора касса»дан, уларнинг маълумотларига кўра, тарғиботчилар, содиқ журналистлар ва оммавий ахборот воситалари пул олади. «Ободонлаштириш, маданий кластерлар ва қандайдир IT полигонлари ниқоби остида улар жуда кўп пулларимизни ўғирлашди. Уни сайловларни бутунлай йўқ қилишга, либерал деб аталмиш журналистларга пора беришга, сўнгги сиёсий эркинликларни йўқ қилишга, бизнинг эътиборимизни боғлар ва скамейкаларга қаратиб, бошқа йўналишга йўналтиришга сарфладилар», дея қайд этган суриштирувчилар.

Унинг муаллифларининг таъкидлашича, ушбу ташкилотдан, жумладан, эр-хотин тарғиботчилар Маргарита Симонян ва Тигран Кеосаян, шунингдек, уларнинг қариндошлари ахборот кампаниясини ўтказиш учун тўғридан тўғри ёки улар томонидан назорат қилинадиган компаниялар орқали пул олишади. Хусусан, улардан бири, «Белый лев» студияси 2021 йилда 185 миллион рубль, Кеосаяннинг ўзи эса «Снято» кўрсатуви бошловчиси хизматлари учун ўша йили яна 61 миллион рубль олган. Бу суриштирувда эълон қилинган ҳужжатлар нусхаларида айтилган.

Бундан ташқари, суриштирув шуни кўрсатадики, Россиянинг Украинага тўлиқ миқёсли бостириб кириши бошланганидан кейин эфирни тўхтатган «Эхо Москвы» радиостанцияси бош муҳаррири Алексей Венедиктов ҳам Собяниндан пул олган. Суриштирувчилар эътиборини «пулли тарғиботчилардан нусха сифатида кўчирилган» кўплаб «ҳоким ҳақидаги мақтовли постлар», шунингдек, Венедиктовнинг 2021 йилги Москва сайловларида электрон овоз беришдаги роли ўзига қаратди. Сайловларни кузатиш бўйича жамоатчилик штаби раҳбари сифатида у масофадан туриб овоз бериш натижаларини тан олди, гарчи мустақил кузатувчилар кўплаб қонунбузарликлар содир этилганини даъво қилишган. 

Навалний жамоасига кўра, RTVi ҳам «Мой район» дастуридан пул олган, 2019-2021 йилларда уларнинг умумий миқдори 840 миллион рублни ташкил этган ва бу оммавий ахборот воситасининг барча бюджети учдан бир қисмидан ошади. Суриштирувда таъкидланишича, Нью-Йорк ва Берлинда жойлашган хусусий рус тилидаги телеканал «Москва мэриясининг пули эвазига кун кўрмоқда». 
 
Шу билан бирга, материал муаллифлари Собяниннинг «қора кассаси» «журналистлар деб аталмиш шахсларга ҳомийлик қилиш билан чекланиб қолмай», балки сиёсатчиларга пора беришда ишлатилишини таъкидламоқда. Пуллар, шунингдек, «Единая Россия»нинг оддий аъзолари бўлган гўёки мустақил номзодларнинг сайлов кампаниясига» сарфланади, «Мой район» харажатларининг катта қисми эса социологик сўровларга сарфланиши айтилган.