Турни бошлаб берган ўйин афиша нуқтайи назаридан энг шов-шувли ўйин бўлмаса-да, моҳиятан куннинг асосий ўйини эди. Бир томондан «Ньюкасл» ЕЧЛда иштирок этишни мақсад қилган. Бошқа томондан — «Астон Вилла» Унаи Эмери келганидан буён шу қадар ўзгардики, у келганидан кейинги даврда Бирмингҳем жамоаси тўпланган очколар сони бўйича фақат «Арсенал» ва «Манчестер Сити»дан ортда.
Жейкоб Рэмсининг голи билан майдон эгалари бу натижа тасодифий эмаслигини кўрсатишди. Танаффусга қадар биргина Рэмси эга бўлган вазиятлар сони (3) «қарғалар»да юзага келган жами вазиятлар сонига тенг бўлди. «Вилла» биринчи бўлимдаёқ ҳисобни йирик кўринишга келтириши мумкин эди, аввалига Уоткинснинг зарбаси устунга тегди, кейин у рақиб мудофаасини доғда қолдириб берган зарбасини Поуп оёқлари учи билан қайтарди. Англиялик форвард иккинчи бўлимда дарвозани ишғол этди, аммо видеотакрордан кейин кичик офсайд қайд этилди. Ҳужумчи олдинга ташланишда давом этди ва кейинги вазиятдан аниқ фойдаланди, ўйин охирида эса ўйиндаги якуний натижани ўрнатиб, сўнгги 12 турда урган голлари сонини 11 тага етказди.
У йил бошидан буён шунча гол урган. Бу даврда Уоткинс АПЛнинг энг яхши тўпурари, шунингдек гол+пас тизими бўйича ҳам етакчи (14). Қаторасига бешинчи ўйинда ғалаба қозонган «Астон Вилла» энди 2023 йилда тўпланган очколар сони (32) ва қуруқ ўйинлар сони (8) бўйича тенгсиз жамоа. Эмери эффекти ақл бовар қилмас даражада, «Ньюкасл» эса чемпионатнинг бу мавсумида илк бор учта гол ўтказиб юборди ва тўртлик учун курашда рақобатчиларига имкон берди.
Лекин «Тоттенҳэм» бу совғадан фойдалана олмади ва ўз уйида сенсацион равишда «Борнмут»га ютқазди. «Шпорлар» «МЮ» ва «Ньюкасл»дан кўра кўпроқ ўйин ўтказгани ҳисобланса, улар Чемпионлар лигаси йўлланмаси учун курашда аутсайдер ҳисобланади. Шанба куни Соланкенинг ўйини лондонликлар учун даҳшатли тушга айланди, у ўзи гол уришидан ташқари, иккита голга узатма берди. Бу узатмалардан иккинчисидан Уаттар унумли фойдаланганида — секундомерда 94:11 рақамлари акс этганди. Ва бу гол Данжуманинг ўйинни қутқариб қолгандек кўринган жавоб голидан бир неча дақиқа ўтиб урилди. Бу «Борнмут» учун АПЛдаги иштироки даврида энг кеч урилган ғалаба голига айланди.
«Челси»нинг қулаши давом этмоқда, Фрэнк Лэмпард эса вазиятни ўнглай олмаяпти. Мураббий ҳар ўйин учун жамоа таркиби ва схемаларини ўзгартириб кўрмоқда, аммо натижа ўзгармаяпти. Бу мавсумда очиқ ва қувноқ ўйин кўрсатаётган «Брайтон» билан ўйинда Мудрикнинг пасидан кейин Галлаҳер ҳисобни очиши ҳам ёрдам бермади. «Чайкалар» шундан кейин ташаббусни қўлга олди, Кепа кўп вазиятларда ўзини кўрсатишига тўғри келди, барибир бўлим охирида Уэлбек ҳисобни тенглаштирди, иккинчи бўлимда чап қанотда ҳужум уюштирган Энсисо Жеймс ва Чалоба ўртасидаги тушунмовчиликдан фойдаланиб, зарба берди, тўп устундан қайтди, Уэлбекнинг зарбаси эса тўсин устидан ўтиб кетди. Энсисо барибир ўз мақсадига эришди ва узоқ масофадан йўлланган аниқ зарбаси билан жамоасига кўклар устидан сафардаги илк тарихий ғалабани келтирди. Бу натижа мутлақо ўйин мантиғидан келиб чиқди, жами зарбалар бўйича (26-8) ва дарвоза соҳасига борган аниқ зарбалар бўйича (10-2) мутлақ устунлик меҳмонлар тарафида бўлди.
«Манчестер Сити»нинг барча турнирлар доирасидаги ғалабали серияси ўн ўйинга етди. «Шаҳарликлар» Чемпионлар лигасида «Лейпциг» мудофаасини яксон этганидан бери (7:0) олти ўйинда камида учтадан гол урмоқда. «Лестер»га қарши ўйинда бундай серияни давом эттиришга Брендан Роджерс бўшатилгани ва унинг ўрнида Дин Смит бошчилигидаги мураббийлар штаби иш бошлагани таъсир кўрсатмади ва бу норма биринчи бўлим ўрталарига келиб бажариб бўлинди.
Ҳоланд икки гол урди ва АПЛ мавсумидаги голлари сонини 32 тага етказиб қўйиб, бу борада Салоҳга тегишли бўлган натижани такрорлади. Норвегиялик ҳужумчи яна икки аниқ зарба бериб, турнир рекордчилари — Энди Коул ва Алан Ширернинг рекордларини такрорлаши мумкин. Лекин бу ерда муҳим бир жиҳат бор: икки афсонавий форвард турнирда 22 тадан жамоа бўлиб, мавсумдаги ўйинлар сони 42 тани ташкил этганида 34 тадан гол уришган. Ҳоланд эса ҳозирнинг ўзида чемпионат 38 турлик тақвимга ўтганидан кейинги максимал натижани такрорлаб улгурди.
Ўйин масаласи ҳал бўлгач, Гвардиола танаффусда биринчи бўлим қаҳрамонлари Стоунз ва Ҳоландни алмаштирди, иккинчи бўлим бошида Родри ва де Брюйне ҳам майдондан олинди. Бу эса жамоа ўйинига таъсир кўрсатмай қолмади, Иҳеначо жавоб голини урди, шундан кейин меҳмонлар тўлиқ ҳужумда ўйнай бошлади ва қатор голли вазиятларга эга бўлишди, аммо Мэдисон яккама-якка вазиятдан фойдалана олмади, Иҳеначонинг қулай вазиятдан йўллаган зарбаси эса дарвоза устунига тегди, яна бир вазиятда тўп жарима майдони ичида мезбонлар футболчисининг қўлига текканида бош ҳакам пеналти белгилаш учун асос топмади.
Ла лигада шанба кунги ўйинларнинг «Реал» ўйинига қадар дастури тўртинчи ўрин учун даъвогарлар кўригига айланди, биринчи бўлиб майдонга бир ҳафта муқаддам «Сантьяго Бернабеу»дан ғалаба билан қайтган «Вилярреал» чиқди. Аммо, афтидан, «сариқ субмариналар» деярли барча ҳиссиётларни ўша ўйинда қолдиришган, қолгани эса мадридликлар футболчиси Валверденинг ўйиндан кейин Баэнага берган зарбаси атрофидаги можарога сарфланган. Ушбу жабрланувчи шанба кунги ўйиннинг бошланғич таркибидан жой олди, аммо ўйинда лигада жон сақлаш учун курашаётган «Валядолид»нинг марокашлик легионерлари барчасини ҳал этишди. 14-дақиқадаёқ ҳисоб 0:2 кўринишини олди. Кике Сетьен жамоаси бунга иккинчи бўлимда фақат бир зарба билан жавоб қайтара олди ва жамоанинг «Реал Сосьедад»га яқинлашиш имкониятлари камаймоқда.
Аммо бундай имконият нолга тушиб кетмади, чунки Сан-Себастьян жамоаси барқарор ўйин кўрсата олмаяпти. Сўнгги вақтларда жамоа уй ўйинида ғалаба қозониб, сафарда мағлубиятга учрашни одат қилган, шанба куни Билбаода бўлиб ўтган басклар дербиси ҳам бундан мустасно бўлмади. Ўйинда дубл қайд этган Иньяки Уильямс «Атлетик» футболчилари сўнгги 11 йил мобайнида ушбу ашаддий рақибга қарши ўйинларда кузатилмаган ишни уддалади. Эрнесто Валверде жамоаси бу ғалабадан кейин еврокубокларга йўлланма берувчи олтинчи ўрин билан фарқни икки очкогача қисқартирди.
Лекин кўп ўтмай «Бетис» хавфли зонадаги «Эспаньол» устидан ишончли ғалабага эришгач, «Атлетик» билан орадаги фарқни яна 5 тага оширди. Каталонияликлар жамоасига устозлик қилаётган Луис Гарсия клубдаги вазиятни ўнглай олмаяпти ва тайинланганидан кейинги икки ўйинда ютқазди, натижада жамоанинг мағлубиятли серияси олти ўйинга етди. Мануэл Пеллегрини жамоаси эса «Вилярреал»ни ортда қолдириб, бешинчи ўринга кўтарилди. Тўртинчи ўрингача — уч очко бор, бир турдан кейин «Бетис» «Реал Сосьедад» билан юзма-юз келади.
Биринчи бўлим «Кадис» дарвозабони Ҳилнинг бенефисига айланди. У ҳақиқий мўъжиза кўрсатди, қайтган тўпга Бензема бир неча метрдан туриб зарба берганида эса унинг омади келиб, тўп тўсинга тегди. Танаффусдан кейин ҳам фаворит вазиятлардан фойдалана олмасликда давом этди.
Қолганини узоқ устун томонни аниқ зарба билан нишонга олган Асенсионинг техникаси ҳал қилди. Ушбу ҳавбек голлари сонини 10 тага етказди, асосий таркиб футболчи бўлмаган ушбу футболчи ўртача ҳар 88 дақиқада гол урмоқда ёки шерикларини самарали пас билан таъминламоқда. Айнан шунинг учун Карло Анчелотти бу футболчи унга кераклигини айтмоқда ва Асенсио «Реал» билан шартномасини узайтиришини истамоқда.
Стефано Пиоли Чемпионлар лигаси чоракфиналида «Наполи»га қарши кечадиган ўйин олдидан ўзи учун нима муҳимлигини аниқ намойиш этди ва Болонядаги ўйинда асосий таркибни деярли тўлиқ ўзгартирди (фақат Менян истисно). «Милан» амалда иккинчи таркиб билан майдонга чиқди ва 33-секунддаёқ гол ўтказиб юборилганини шу билан изоҳлаш мумкин.
Лекин бу голга танаффус арафасида Побеганинг узоқ масофадан йўллаган зарбаси билан жавоб қайтарилди. Лекин «россонери»лар таваккалчилик қилишмади ва ўйинда дуранг ҳисоб сақланиб қолди. Бу натижа еврокубоклар учун рақобатчилар фойдасига хизмат қилади, бу ўйиннинг «бериб юборилгани» ўзини оқлайдими, йўқми — кейинги ҳафтада Неаполда кечадиган ўйин кўрсатади.
Лучано Спаллетти таркиб танлашда у қадар радикал бўлмади, лекин турнирдаги вазиятдан келиб чиққан ҳолда «Наполи» ҳам кўпроқ етакчиларига дам бериши мумкин эди. Бу табиийки, еврокубок ўйинларида дисквалификацияга учраган Ким Мин Жэ ва Замбо Ангиссага тааллуқли эмас. Аммо Кварацхелия ва Зелиньски ўйинни захирада бошлади, асосийси — уларнинг ёнида жароҳатидан тузалган Осимҳен ҳам ўтирарди. Нигериялик ҳужумчи иккинчи бўлимда захирадан тушиб, гол ура олмаган бўлса-да, у борлигида неаполитанликларнинг ўйини қандай ўзгаришини кўрсатиб берди — унинг сўнгги дақиқалардаги зарбаси дарвоза тўсинига тегди. Ундан бир неча кундан кейин «Милан»га қарши кечадиган ўйинда гол уриши талаб этилади.
Чемпионлар лигасининг яна бир иштирокчиси ҳам таркибда жиддий ротация амалга оширди, «Интер» ҳужумида Лукаку ва Корреа дуэти майдонга тушди. Аммо муваффақиятсиз натижани шунинг ўзига боғлаш ўринсиз. «Нерадзурри»да дарвозани ишғол этиш учун етарлича имкониятлар бўлди, аммо улар ўз тарихида илк бор қаторасига уч уй учрашувида бирорта гол ура олмасдан мағлуб бўлди. Бундай ўйинлар билан Симоне Индзаги жамоаси бешинчи ўринга тушиб кетгани ажабланарли эмас. Адриано Галлианини хушнуд этган «Монца»га эса битта бурчак зарбаси ва ҳимоячи Кальдироланинг бош билан берган зарбаси етарли бўлди.
Шанба куни «Парк де Пренс»да кечган ўйинда амалда чемпионлик интригаси тақдири ҳал бўлиши керак эди. Бу ўйин эса парижликлар бош мураббийи Кристоф Галте ирқчилик ва мусулмонларга ҳурматсизликда айбланиши фонида кечди. Энди у «Ницца»нинг собиқ спорт директори, RMC Sport журналистларига шу ҳақда айтиб берган Фурнье билан (аввалроқ Франция миллий жамоаси бош мураббийи Дидье Дешам ҳам уни судга берганди) судлашади. Бунга параллел равишда прокуратура ҳам ўз текширувини бошлаган, аммо муқаддам Галте билан ишлаганларнинг барчаси унинг ёнини олмоқда.
Интернетда мураббий истеъфо ёқасида тургани ҳақидаги сон-саноқсиз ҳазиллар ёзилаётган вақтда «ПСЖ» идеал футбол намойиш этди. «Ланс»нинг ўзи ҳам амалдаги чемпионларнинг вазифасини осонлаштириб берди, меҳмонлар 19-дақиқадан бир киши кам бўлиб ўйнашди. Қизиқ жиҳати, бу мавсумда фоллар сони бўйича (69) лигада етакчи бўлган Самед муддатидан олдин кийим алмаштириш хонасига йўл олди.
Шундан кейин майдон эгалари биринчи бўлимнинг ўзида ҳам алоҳида ўйиннинг, ҳам чемпионлик курашининг интригасини кўмиб қўйишди. Аввалига Мбаппе рақиб дарвозасини ишғол этиб, тўртинчи бор бир мавсумнинг ўзида урган голлари сонини 20 тага етказди. Кейин эса Килиан ва Месси чиройли комбинация уюштиришди, аргентиналик футболчи франциялик жамоадошининг товон билан берган пасини қабул қилиб, жарима майдонига кириб борди ва дарвозани ишғол этди. Бу жорий мавсумда Месси ва Мбаппе бир-бирига ассист бериш орқали гол урилган 23-голли комбинацияга айланди.
«Манчестер Сити»дан учралган 0:3 ҳисобидаги мағлубиятдан кейин Германия чемпионлари ўз уйида «Ҳоффенҳайм»га қарши ўйинда дуранг билан кифояланди. Шу билан бирга, жамоа биринчи бўлимда ҳисобни очиб, жорий мавсумда биринчи бўлимда урган голлари сонини 52 тага етказди, бу орқали ўзининг икки йил олдин қайд этилган рекордини такрорлади. Ўйин охирида «Бавария» том маънода рақибни жарима майдонига қамаб қўйди, аммо жамоа ғалабага ҳақли эди дейиш қийин. Жамоа фанатлари «Боруссия» ўйинидан келган хабарни нишонлашди.
Дортмунд бу ўйинда пешқадамликка қайтишга жуда яқин эди — чунки шанба куни барча воқеалар «Боруссия» фойдасига кечаётганди. Аввалига Мален ўйинни ёндириб, ўнг қанотда рақиб ҳимоячиларини финтлари билан доғда қолдирди ва Аллерга ассистентлик қилди, кейин ўзи ҳам гол урди. Бунинг устига биринчи бўлим охирларида рақиб таркибида Мавропанос икки сариқ карточка олди. Турнир жадвалининг қуйи қисмидаги жамоага қарши ўйинда бу вазиятда устунлик бой берилишини ҳеч ким ўйламаганди.
Аммо «Штутгарт» синиб қолмади ва иккита гол билан жавоб қайтарди. Аммо энг ақл бовар қилмас воқеалар ўйинга қўшиб берилган дақиқаларда рўй берди. «Боруссия» Рейнанинг голи билан ниҳоят рақибни таслим қилгандек кўринди.
Одатда бундай зарбадан кейин рақиб ўзига кела олмайди, аммо мезбонлар қўшиб берилган еттинчи дақиқада гол уриб, мағлубиятдан қутулиб қолишди. Бу катта эҳтимол билан дортмундликларга чемпионлик характери етишмаётгани билан боғлиқ, бусиз эса ҳатто оқсоқланаётган «Бавария»дан ўзиб кетиш ҳам қийин.
«Лейпциг» эса ўзидан кутилган ўйинни намойиш этди. Ҳа, жамоа тезкор гол ўтказди, аммо бунга реакция вақтида ва кучли берилди. Икки дақиқа ичида дубл қайд этган Вернер турнирдаги голлари сонини 100 тага етказди. Бунинг учун ушбу ҳужумчига 224 ўйин етарли бўлган, бу ғалабадан кейин мезбонлар кучли тўртликдаги ўрнини сақлаб қолишди.
Бешинчи ўринда келаётган «Фрайбург» бу турда Марко Розе жамоасига етиб ололмаслиги аниқ. «Унион» эса «Боҳум» билан ўз уйидаги ўйинда очко олса, учинчи ўринга қайтиши мумкин.
Кун статистикаси
«Порту» футболчилари 2 йилдан буён Португалия чемпионатида уй ўйинларида пеналтида хато қилишмаяпти.
Белгия дивизионида 1994/95 йилги мавсумда дебют қилган «Остенде» ўтган вақт ичида 4-бор иккинчи лигага тушиб кетди. Бу вақт ичида бошқа ҳеч бир жамоа бунча кўп бор қуламаган.
Рой Ҳожсон тайинланганидан буён уч ўйин ўтказган «Кристал Пэлас» 100 фоизлик натижага эришди ва бу ўйинларда 9 гол урди.
«Фенербаҳче» футболчилари жорий мавсумда Туркия чемпионатида 14 бор пеналти тепиш ҳуқуқига эга бўлди.
20 мағлубият — «Гронинген»нинг Нидерландия чемпионатининг бир мавсумидаги энг ёмон натижаси. Аутсайдер жамоада бундай ёмон кўрсаткич 1974 йилдан буён кузатилмаганди.
«ПСЖ» 31 турдан кейин 72 очко жамғарди. Франция чемпионати тарихида 31-турдан сўнг етакчининг бунча очко тўплаши 8 бор кузатилган ва барчасида ўша жамоа чемпион бўлган.
