USAID администраторининг Осиё бўйича ёрдамчиси ўринбосари Ўзбекистонга келади

26-30 август кунлари АҚШ Халқаро тараққиёт агентлиги (USAID) Осиё бўйича бюро ёрдамчиси ўринбосари Анжали Каур Ўзбекистонга келмоқда. АҚШ-Ўзбекистон ҳамкорлик алоқаларини ривожлантиришни мақсад қилган ташриф доирасида Каур хоним USAIDʼнинг мамлакатдаги ҳамкорлари ва ҳукумат расмийлари билан учрашади.

Фото: USAID

Хусусан, дастур давомида Самарқандда инглиз тили ўқитувчилари билан давра суҳбати, USAID томонидан молиялаштирилган мигрантлар учун маслаҳат марказига ташрифлар назарда тутилган.

USAID ваколатхонасининг маълум қилишича, Анжали Каур фармацевтика соҳасида халқаро сифат стандартларини таъминлаш ҳамда хавфсиз дори воситаларидан фойдаланиш имкониятларини ошириш бўйича ССВ ҳузуридаги марказ билан англашув меморандумини имзолаши кутилмоқда.

Анжали Каурнинг фаолият доираси Жанубий ва Марказий Осиё, жумладан, Ўзбекистон, шунингдек, бутун Осиё минтақаси учун техник хизматларни қамраб олади.

22 август куни АҚШ Халқаро тараққиёт агентлигининг (USAID) Ўзбекистондаги миссиясига Девид Хофман янги директор этиб тайинлагани хабар берилган эди.