Россия ТИВнинг таъкидлашича, Россия санкциялардан ҳақиқий озод қилиш ўрнига БМТ котибиятидан янги ваъдалар тўпламини оляпти, холос.
Россия «Қора денгиз ташаббуси»ни қайта тиклаш имкониятини кўриб чиқишга тайёр, аммо фақат қишлоқ хўжалиги маҳсулотлари ва ўғитлар билан шуғулланадиган Россия компанияларидан санкцияларни олиб ташлаш бўйича талаблар тўлиқ амалга оширилиши керак. Бу ҳақда 6 сентябр куни ТИВ сайтида эълон қилинган Россия ТИВ баёнотида айтилади.
«Шубҳасиз, Ғарб давлатлари томонидан тегишли қадамлар истиқболлари кўринмаяпти, ҳатто Киевда Россияга қарши янада қаттиқроқ санкциялар қўллашни давом эттириш лозимлиги билдириляпти, улар Россиянинг, умуман озиқ-овқат хавфсизлиги, ғалла ва ўғитлар бўйича глобал жануб эҳтиёжларини ўйламаяпти», - дейилади Россия ТИВ баёнотида.
Россия Ташқи ишлар вазирлигининг таъкидлашича, «агар Ғарб ва Киев ҳақиқатан ҳам Қора денгиз йўлагига муҳтож бўлса, қишлоқ хўжалиги маҳсулотлари ва ўғитларини ишлаб чиқариш ва экспорт қилиш билан шуғулланувчи маҳаллий субъектларга нисбатан ноқонуний бир томонлама санкцияларни бекор қилиш бўйича аниқ чоралар кўриш вақти келди».
«Бироқ, Россия санкциялардан ҳақиқий озод қилиш ўрнига, БМТ котибиятидан янги ваъдалар тўпламини оляпти», — дейилади ТИВ хабарида.
Идоранинг таъкидлашича, «аслида, ҳозирги таклифлар, БМТнинг олдинги ғоялари каби, ҳеч қандай янги элементларни ўз ичига олмайди ва Россия қишлоқ хўжалиги экспортини нормаллаштиришда сифатли муваффақиятга эришиш учун асос бўла олмайди».
«Бирлашган Миллатлар Ташкилотининг Россия-БМТ меморандумининг бажарилишини таъминлаш бўйича кейинги режалари ҳақидаги савол очиқ қолмоқда, чунки (БМТ бош котиби) Антониу Гутерриш келишувдан чиқиш нияти йўқлигига ишонтирди», — дея таъкидлади ТИВ.
Ташқи ишлар вазирлигининг билдиришича, «Россия, ўз навбатида, маҳаллий озиқ-овқат ва ўғитларни экспорт қилишни давом эттиради, бу жаҳон нархларини барқарорлаштиришга ва уларнинг умумий мавжудлигини яхшилашга ёрдам беради», шунингдек, ўз маҳсулотларини муҳтожларга бериш бўйича саъй-ҳаракатларни тўхтатмайди.
«Россия, Туркия ва Қатарнинг Россиядан Туркияда қайта ишлаш учун 1 миллион тонна ғалла етказиб бериш бўйича қўшма лойиҳаси, кейинчалик энг камбағал мамлакатларга бепул ташиш ҳам катта аҳамиятга эга. Бундан ташқари, гап йил давомида «Қора денгиз ташаббуси» доирасида муҳтожларга юборилган бир хил миқдордаги озиқ-овқат ҳақида кетмоқда», — дея хулоса қилди ТИВ.
