Германия, АҚШ ва Европа Иттифоқи БМТнинг иқлим бўйича конференцияси иштирокчиларидан бўлиб, улар қазиб олинувчи энергия манбаларидан босқичма-босқич воз кечиш тўғрисида қарор қабул қилинмаган якуний баёнотни қўллаб-қувватламади.
БМТнинг иқлим ўзгариши бўйича конференцияси (COP28) унинг иштирокчилари якуний баёнот бўйича келиша олмагани сабабли узайтирилади, дея хабар берди жаҳон агентликлари 12 декабр, сешанба - тадбир якунланиши режалаштирилган кунда.
Асосий келишмовчиликлар конференция иштирокчиларининг якуний ҳужжатда қазиб олинувчи энергия манбаларидан, яъни кўмир, нефт ва газдан бутунлай воз кечишга эришиш мажбуриятини белгилашга бўлган муносабатидир. Аввало, Германия, Европа Иттифоқи ва АҚШ бу қарорни қабул қилишни ёқлаб чиқди. ОПEКга аъзо давлатлар Саудия Арабистони ва Россия бунга қарши.
Конференция аввалида БМТ бош котиби Антониу Гутерриш унинг иштирокчиларини қазиб олинадиган ёнилғидан бутунлай воз кечиш тўғрисида қарор қабул қилишга чақирди. Бироқ ОПEКнинг нефт қазиб олувчи қатор давлатлари, жумладан Саудия Арабистони ва Россия бу ташаббусни қўллаб-қувватламади. ОАВ маълумотларига кўра, 21 саҳифалик COP28 якуний баёнот лойиҳасида кўмир, нефт ва газдан бутунлай воз кечиш бўйича аниқ қарор белгиланмаган. Бунинг ўрнига, улардан фойдаланишни чеклаш бўйича ноаниқ чақирув мавжуд.
Иқлим ҳаракати тарафдорлари орасида умидсизлик
"Яшиллар" партияси аъзоси, Германия ташқи ишлар вазири Анналена Бербок ҳужжатни "ҳафсалани йўқ қиладиган" ва "қабул қилиб бўлмайдиган" деб атади. "Биз бу матнни қўллаб-қувватлай олмаймиз", деди у.
АҚШ вакили Жон Керри ҳам худди шундай фикрни билдирди. "Шартноманинг қазиб олинадиган ёнилғига оид матни унинг глобал исишни 1,5 даражагача чеклаш мақсадига эришиш қобилиятини синовдан ўтказа олмайди", деди у.
Орол давлатлари делегациялари ҳам чуқур умидсизликни билдирдилар, экспертларнинг фикрига кўра, улар исиш туфайли денгиз сатҳининг кўтарилиши натижасида сайёра юзидан йўқолиши мумкин. Шу тариқа, Тинч океанидаги Маршалл ороллари давлати вакили Жон Силк журналистларга шундай деди: "Биз конференцияга ўлим фармойишимизни имзолаш учун келганимиз йўқ".
Ўз навбатида, Саудия Арабистони вакили Нура Алисса якуний қарор "ҳамма учун ишлаши керак"лигини таъкидлади. "У ушбу залда ҳар бир мамлакат манфаатларини қондириш учун бу мазмунли бўлиши лозим, бошқаларнинг зарарига ишлаши керак эмас", деди у.
Дубайдаги конференция ишини узайтириш тарафдори бўлган давлатлардан бири Германия бўлди. "Европа делегацияси учун бу муаммо эмас. Вақтимиз бор ва биз узоқроқ қолишимиз мумкин", деди Германия ташқи ишлар вазири Анналена Бербок бу борада.
