Тошкентда 11-синф ўқувчиси мактаб ошхонасида «димавушка» тутатди. Ҳолат юзасидан терговга қадар суриштирув бошланди

Ижтимоий тармоқларда Юнусобод туманидаги 97-мактаб ўқувчилари мактаб ошхонасида кучли тутун чиқарувчи моддани тутатгани ҳақида хабарлар тарқалди. Тошкент шаҳар ММТБ ҳолат юзасидан маълумот берди.

Фото: Видеодан кадр

Қайд этилишича, мазкур ҳолат Тошкент шаҳар мактабгача ва мактаб таълими бошқармаси ишчи гуруҳи томонидан ўрганилди.

Унга кўра, 2023 йил 14 декабр куни соат 10:15 ларда Юнусобод туманидаги 97-сонли умумтаълим мактабининг ошхонасида 11-«А» синф ўқувчиси И.Ж. танаффус вақтида ёнида бўлган «димавушка» номли қўлбола ясалган кучли тутун чиқарувчи моддани тутатганлиги аниқланган.

Бу ҳодисани шу мактабнинг 9-«В» синф ўқувчиси А.А. ўзининг уяли телефони орқали видеотасвирга олган ва ижтимоий тармоқдаги саҳифасига жойлаштирган ҳамда тарқатган.

Ҳозирда мазкур ҳолат юзасидан терговга қадар суриштирув ишлари олиб борилаётгани маълум қилинган.