АҚШ Украина бўйича янги стратегияни тайёрламоқда — ОАВ

Оқ уй Украинадаги уруш учун янги стратегияни ишлаб чиқмоқда, у бой берилган ҳудудларни қайтариб олишни назарда тутмайди, лекин асосий эътибор Украина Қуролли Кучларига Россия ҳужумларини қайтаришда ёрдам беришга, мудофаа қобилиятини ва Украина иқтисодиётини узоқ муддатли мустаҳкамлашга қаратилган. Бу ҳақда The Washington Post (WP) Оқ уй расмийларига таяниб ёзди.

Нашр суҳбатдошларидан бирининг сўзларига кўра, ғоя Украинага жанг майдонида ўз мавқеини сақлаб қолиш имкониятини бериш, бироқ «уни 2024 йил охиригача анча кучлироқ бўлиши учун бошқа йўлга йўналтириш»дан иборат.

Ўтган йилги стратегияда АҚШ ва иттифоқчилар Украинанинг шарқий ва жанубий қисмларини эгаллаб олган рус қўшинларини чекинишга мажбур қилади деган умидда Киевга техника юборган ва жангчиларини тайёрлаган эди. Бироқ, бу режа асосан Россиянинг олдинги чизиқдаги кучли мустаҳкамланган мина майдонлари ва хандақлар туфайли барбод бўлди. Шу сабабли янги стратегия ўтган йилга нисбатан кескин ўзгарган.

Энди Ғарб давлатлари Киевдан сўнгги пайтларда анча муваффақиятли бўлган тактикага эътибор қаратишини истамоқда: масофадан ўққа тутиш, Қора денгиз флотини тийиб туриш, ракета зарбалари ва диверсия орқали россияликларни Қримга «боғлаб қўйиш».

АҚШ режаси қарийб ўттиз давлат ёрдамида тайёрланган, уларнинг ҳар бири Украина учун аниқ мажбуриятларни белгилаган. АҚШ бу келишувни 2024 йил баҳорида эълон қилиши мумкин. 10 йилга мўлжалланган ҳужжат Украина қуролли кучларининг қисқа муддатли ҳарбий амалиётларини қўллаб-қувватлаш, шунингдек, Россия агрессиясини тўхтата оладиган кучларни яратишни кафолатлайди.

WP суҳбатдошларидан бирининг сўзларига кўра, бу украиналиклар шунчаки мудофаа хандақларини қазиб, «унинг ичида йил бўйи ўтиради» дегани эмас. Унинг қўшимча қилишича, стратегик аҳамиятга эга бўлган кичик аҳоли пунктлари бўйича ҳар икки томонда ҳам «ҳудуд алмашинуви» бўлади, «ракета ва дронлар» учирилади, рус қўшинлари фуқаролик инфратузилмасига ҳужум қилишда давом этади.

Бироқ, бу режа сиёсий хавфларни ҳам ўз ичига олади - украиналиклар фронтдаги турғунликдан норозилигини билдира бошлаши мумкин ва Ғарб давлатлари раҳбарлари Украинадаги урушни молиялаштиришда ўз фуқароларининг сабр-тоқати чексиз эмаслигини яхши тушунади.