Кремл Германияни «қатъий қарама-қаршилик» сиёсатида айблади

Россия ҳукумати Германияни Москвага нисбатан душманлик сиёсатини юритаётганликда айблади. «Германия Россия билан ҳал қилувчи қарама-қаршилик йўлига ўтгани ҳеч кимга сир эмас», деди Россия президенти матбуот котиби Дмитрий Песков 26 январ, жума куни. Шу билан бирга, Кремл кескинлик кучайган ва Германияни ҳимоя қилиш зарурати юзага келган ҳолат учун Берлин ишлаб чиқаётган Германия мудофааси бўйича операцион режа (OPLAN) билан «жиддий танишиб чиқиш» зарурлигини билдирди. Шу билан бирга, Россия ахборот агентликлари Германия томонидан кўрилаётган чораларни «Россияни жиловлаш режаси» деб атади.

Германиянинг ўттиз йил ичидаги биринчи мудофаа режаси 

Берлиннинг миллий мудофаа тизимини такомиллаштириш чора-тадбирлари ҳақида бир кун аввал dpa бундесвер ҳудудий мудофаа штаби бошлиғи генерал-лейтенант Андре Бодеманга таяниб хабар берган эди. Бир неча юз саҳифадан иборат махфий ҳужжат март ойининг охиригача тайёр бўлиши керак ва Германияни ҳимоя қилиш учун зарур бўлса, алоҳида органлар ва муассасаларнинг ҳаракатларини белгилайди. Шу тариқа, Германия совуқ уруш давридан бери биринчи марта замонавий ва кенг қамровли мудофаа режасига эга бўлади, дея таъкидлайди агентлик. 

НАТО иттифоқчиларига ҳужум қилинган тақдирда Германиянинг вазифалари кучлар ва таъминотни жойлаштириш йўналишларини қўллаб-қувватлашни ўз ичига олади, деб ёзади dpa. Бундесвернинг режалаштириш бўйича мутахассислари тахминига кўра, Шимолий Атлантика алянси ўз шарқий қанотини ушлаб туриш ва ҳимоя қилиш учун немис кучларининг муҳим қисмидан фойдаланади, шунинг учун Германиянинг ўзида бу кучлардан фойдаланиш имкони бўлмайди.

Бундесвердаги таҳдидлар қаторида дезинформацияни, бу орқали душман ҳокимият қарорларига, жамоатчилик фикри ва оммавий ахборот воситаларига таъсир ўтказишга ҳаракат қилишини, энергетика ва телекоммуникация компанияларига киберҳужумларни, шунингдек, мақсадли жосусликни санаб ўтган. Таҳдиднинг яна бир тури - бу «қўшинларни жойлаштиришни мураккаблаштириш ёки олдини олиш учун бирор нарсани ўчириб қўйишга ҳаракат қиладиган махсус кучлар диверсияси», деди Бодеман. Бундан ташқари, муҳим инфратузилма баллистик ракета ҳужуми нишонига айланиши мумкин ва Германия бундай ҳужумларга қарши мудофаа тизимини ривожлантириш устида ишламоқда, дея қўшимча қилди генерал.