Tesla газ педали ёпишиб қолиш хавфи туфайли барча Cybertruck пикапларини қайтариб олади

Назорат органи бунга ишлаб чиқариш жараёнида совун ишлатилгани сабаб бўлганини таъкидламоқда.

Фото: Chengdu Economic Daily/VCG/Getty Images

Tesla компанияси газ педали «ёпишиб қолиш» хавфи туфайли барча Cybertruck пикапларини қайтариб олишини эълон қилди.

АҚШ йўл ҳаракати хавфсизлиги миллий бошқармаси (NHTSA) томонидан эълон қилинган билдиришномага кўра, «катта куч билан босилса, газ педали ёстиғи жойидан чиқиб кетиши ва педал ёпишиб қолиши мумкин».

Cybertruck педалининг «ёпишиб қолиши» хавфи аввалроқ ижтимоий тармоқлар ва ихтисослашган форумларда муҳокама қилинган эди.

NHTSA хабарига кўра, газ педали ёстиғининг беқарор маҳкамланиши Техаснинг Остин шаҳридаги заводда Cybertruck йиғиш технологиясининг рухсатсиз ўзгартирилиши билан изоҳланади. Педал ёстиғини ўрнатишни соддалаштириш учун автомобил заводида совун ишлатилган. Совун қолдиқлари қисмларнинг ёпишишини камайтирди ва дизайн ишончсизроқ бўлди.

Tesla томонидан 2023 йил 13 ноябрдан 2024 йил 4 апрелгача ишлаб чиқарилган жами 3878 та пикап қайтариб олиниши керак. Бу электромобилларнинг деярли барчаси, деб ёзди CNN.

Cybertruck - бу Teslaнинг пикаплар бозорига киришга биринчи уриниши бўлиб, улар Техаснинг Остин шаҳрида йиғилади.

Tesla 2023 йил ноябр ойида 60990 долларга олдиндан буюртма орқали Cybertruck етказиб беришни бошлаган эди.